Në mungesë të kuorumit ka dështuar mbledhja e Komisionit për Administratë Publike, Pushtet Lokal, Media dhe Zhvillim Rajonal, ku do të raportonte Komisioni i Pavarur për Media dhe bordi i ARBK-së në lidhje me çështjen e Klan Kosovës.
Komisioni parlamentar nuk kishte votat e mjaftueshme për të miratuar rendin e ditës, pasi deputetët opozitarë nuk morën pjesë në votim, gjë e cila nxiti polemika pozitë-opozitë.
Kryetari i komisionit, Valon Ramadani, kritikoi deputetët opozitarë që nuk morën pjesë në votim të rendit të ditës.
Ramadani: Deputetët e PDK-së, të papërgjegjshëm
“Është e papërgjegjshme kur disa deputetë, në këtë rast pikërisht ju zotëri Lushtaku dhe Isak Shabani që mbledhjen e kaluar keni kërkuar të që diskutohet bashkë me ARBK-në, ndërsa sot nuk votoni për diskutimin”, tha ai.
Por atij iu kundërpërgjigj deputeti i PDK-së, Mërgim Lushtaku, i cili tha se është e papërgjegjshme nga mazhoranca që nuk i ka numrat edhe për miratim të rendit të ditës së komisioneve.
Ai tha se është qëndrim i PDK-së që të mos merr pjesë në votime në seanca dhe komisione, deri në shpërbërjen e Kuvendit.
Lushtaku: Kjo mbledhje nuk ka arsye me vazhdu
“Kjo mbledhje nuk ka arsye me vazhdu. Është e papërgjegjshme pse nuk i bëni si mazhorancë numrat e nevojshëm që t’i bëni numrat dhe të diskutoni”, deklaroi ai.
Po ashtu edhe deputeti i LDK-së, Agim Veliu, tha se nuk mund të vazhdohet me mbledhjen e këtij komisioni, pas dështimit të miratimit të rendit të ditës, për çka e bëri përgjegjëse pozitën.
Veliu: Nuk mund të vazhdohet mbledhja e javës së kaluar
“Në bazë të informacioneve dhe fakteve kjo është mbledhje e rregullt e komisioni, është votuar për një rend të ditës dhe nuk kaloi i njëjti. Nuk e di sa ka mundësi kjo mbledhje të shndërrohet në vazhdim të një mbledhje tjetër”, tha Veliu.
Kryetari i komisionit, Valon Ramadani, tha se të njëjtën mbledhje do të thërras ditëve në vijim.
