Deputetja e Aleancës për Ardhmërinë e Kosovës, Time Kadrijaj, ka reaguar lidhur me vendimin e Ministrisë së Arsimit që t’i subvencionojë prindërit për blerjen e teksteve shkollore për nxënësit.
Sipas saj, vendimi për mossigurimin e librave për nxënësit në ketë fillim vit po e rëndon buxhetin familjar të prindërve, të cilët kanë më shume se një fëmijë.
“Kjo qeveri kur është në pyetje interesi i qytetarëve nuk ka vendimmarrje dhe vonohen në vendime, kështu ata edhe më shume po e komplikojnë jetën e qytetarëve”, ka shkruar deputetja në Facebook.
“Po sa efikase dhe sa e sigurt është që kush aplikon në platformën e-Kosova a do funksionoj dhe a do rimbursohen mjetet, apo ky është një mashtrim i radhës për blerje te kohës që ndoshta prindërit asnjëherë nuk do i marrin këto mjete”.
Kadrijaj tutje ka thënë se duhet kujdes i shtuar në plotësimin e aplikacionit se “deputetët e VV-së ju kanë kërcënuar!”.
“Qeveri e turpit dhe për faqe të zezë!”, ka përfunduar ajo.
