Kryetari i Aleancës për Ardhmërinë e Kosovës, Ramush Haradinaj tha dje se zgjidhja e duhur është që Qeveria Kurti të shkojë në shtëpi, duke aluduar kështu dorëheqjen e Qeverisë.
Ndaj kësaj deklarate të Haradinajt reagoi sot kryetari i Kuvendit të Kosovës, Glauk Konjufca.
Ai tha se Qeveria është në shtëpinë e vet.
“Qeveria Kurti në shpi osht. Është në shtëpinë e vet. Këtu është shtëpia e Qeverisë”, tha Konjufca duke qeshur.
Kryetari i Aleancës për Ardhmërinë e Kosovës, Ramush Haradinaj ka thënë dje që mocioni i mosbesimit ndaj Qeverisë së Kosovës mbetet ende opsion.
Sipas tij mocioni është mënyra e duhur për rrëzimin e Qeverisë së udhëhequr nga Albin Kurti.
“Mocioni është mënyra më e duhur dhe legjitime, është demokraci. Aktualisht opozita i ka votat sa me e iniciu mocionin, pastaj duhet ndihma e deputetëve të tjerë. Shpresoj që në një rrethanë të caktuar do ta arrijmë unitetin brenda opozitës, por po është opsion”, tha Haradinaj.
Tutje, kryetari i AAK-së deklaroi se zgjidhja e duhur për vendin do të ishte tërheqja e kësaj Qeverisë.
“Në Parlament pra Kurti dhe Qeveria e tij ka shumë llogari me dhënë, para kuvendit, para Kosovës. Po shpresoj poashtu që gjitha këto zhvillime e kanë në fund e që fundi është që të shkojë në shtëpi Qeveria Kurti”, tha ai.
Pas kësaj, ai y pyet nga gazetarët se “Çfarë nëse nuk shkon Qeveria Kurti?”
“Shkon, shkon”, është përgjigjur Haradinaj.
