Zgjedhjet në veri të Kosovës do të mbahen më së voni për një muaj e gjysmë, thotë ish-shefi i misionit serb në Uashington dhe pjesëmarrës në negociatat e Dejtonit, Nebojsha Vujoviq. Në prag të takimit në Bruksel, ai thotë se pritet që Kurti dhe Vuçiqi të arrijnë marrëveshje, përkatësisht të merren vesh për de-përshkallëzimin e situatës me shpalljen e zgjedhjeve dhe kthimin e serbëve në institucionet e Kosovës.
Ish-diplomati ka deklaruar për N1 se bashkësia ndërkombëtare po kërkon nga Serbia të përmbushë detyrimet që dalin nga marrëveshjet e këtij viti të arritura në Bruksel dhe Ohër.
“Edhe pse Vuçiqi po ikën si djalli nga kryqi, për të mos vënë nënshkrimin e tij… deklarata e kreut të shtetit është e barabartë me çdo nënshkrim, është e detyrueshme. Në Ohër, ai e “ngarkoi” Serbinë me udhërrëfyesin”, ka pretenduar Vujoviqi.
Dhe kjo do të thotë, ka shtuar ai, se nga Serbia kërkohet që të ushtrojë ndikim tek serbët në veri të Kosovës në mënyrë që ata pashmangshëm të shkojnë në zgjedhjet lokale dhe të kthehen në institucionet e Kosovës.
“Është një kërkesë që Serbia nuk mund ta shmangë, pasi Albin Kurti po përballet me presion të madh që ata kryetarë të sapo zgjedhur të japin dorëheqje dhe të krijojnë hapësirë për mbajtjen e zgjedhjeve të reja në të katër komunat në veri të Kosovës”, ka thënë Vujoviqi.
Edhe pse udhëzimi administrativ për shkarkimin e këtyre kryetarëve të kombësisë shqiptare sapo është hartuar dhe lind pyetja nëse dikush do të nisë një peticion për shkarkimin e tyre dhe të fillojë një procedurë që mund të marrë kohë, Vujoviq beson se zgjedhjet do të mbahet “brenda një muaji apo një muaji e gjysmë”.
Ai nuk ka shpjeguar se si do të mund të organizohen zgjedhjet lokale brenda kësaj periudhe, ndërsa, nga ana tjetër, parashikon “probleme të mëdha” nëse të dyja palët nuk përmbushin detyrimet e tyre, gjë që nënkupton zgjerimin e sanksioneve.
Duke folur për takimin e nesërm mes presidentit serb dhe kryeministrit të Kosovës në Bruksel, Vujoviq thekson se këto ditë nuk ka pasur një “akt zhonglimi të njohur” mes Vuçiqit dhe Kurtit – “ku krijojnë tension, pastaj shkojnë të pinë kafe dhe dalin me një marrëveshje.
Nga ana tjetër, ai ka pretenduar se në këtë raund të dialogut – i pari pas shpërthimit të krizës në veri të Kosovës – pritet të arrihet një marrëveshje, gjegjësisht marrëveshje me qëllim të deeskalimit të situatës.
“Që serbët të shkojnë në zgjedhje në të katër komunat, që policët serbë të kthehen në vendet e tyre të punës në veri, që organet e drejtësisë, prokuroria, strukturat komunale të kthehen dhe të përfshihen plotësisht në këtë hapësirë normale të jetesës, dhe të funksionojnë në Kosovë”.
Nga ana tjetër, ai thotë se Kurti është i vetëdijshëm se nuk do të ishte mirë të thellohet edhe më tej konflikti me ndërkombëtarët.
Në të njëjtën kohë, Vujoviq “e ka akuzuar” presidentin serb se i ka “dhuruar gjithçka” Kosovës dhe se e vetmja gjë që ka mbetur është formalizimi i bashkëjetesës mes dy shteteve të pavarura
