Gjykata Themelore në Prishtinë ka dënuar me 200 euro gjobë ministren e Industrisë, Ndërmarrësisë dhe Tregtisë, Rozeta Hajdarit për rastin e aksidentit ku goditi një fëmijë në “Arbëri” të Prishinës në vitin 2022.
Sipas Themelores, dënimi është vendosur në bazë të neneve 3,7,8,9,17 paragrafi 1 pika 1.2,1.5.31 dhe te nenit 35 të Ligjit për Kundërvajtje, që ministres Hajdari t'i shqiptohet dënim në shumën prej 200 eurosh.
“E pandehura R.H obligohet që të paguajë shumën prej njëqind 100 euro për mendimin e ekspertit të komunikacionit, po ashtu obligohet të paguajë shumën prej nëntëqind 900 euro për super ekspertizë dhe për ekspertizë mjeko - ligjore të paguajë shumën prej 50 euro. Nëse e pandehura nuk e kryen pagesën e gjobës në afatin e paraparë me ligj, si dhe shpenzimet e procedurës kundërvajtëse, në të kundërtën ekzekutimi do te bëhet sipas dispozitave të Ligjit të Procedurës Përmbarimore”, thuhet në komunikatën e Gjykatës.
Gjykata Themelore ka vendosur lidhur me çështjen kundër të pandehurës Hajdari, për shkak të aksidentit në komunikacion të kundërvajtjes nga neni 53 paragrafi 1 të Ligjit për Rregullat e Trafikut Rrugor e ndërlidhur me nenin 255 paragrafi 2 të Ligjit për Rregullat e Trafikut Rrugor, në bazë të nenit 55 paragrafi 2 dhe nenit 77, 86, 119, 124, 127 të Ligjit për Kundërvajtje, si dhe në bazë të nenit 289 paragrafi 1 pika 1.2 të Kodit Penal të Republikës së Kosovës.