Deputeti i Kuvendit nga radhët e Lidhjes Demokratike të Kosovës, Driton Selmanaj ka shprehur brengen e tij se Gjykata Kushtetuese mund të mos lëshohet fare në shqyrtimin e statutit të Asociacionit.
Ai ka treguar edhe arsyet se pse Kushtetuesja mund të mos e shqyrtojë fare këtë çështje, duke thënë se kjo gjykatë nuk ka mandat të trajtojë substancën e marrëveshjeve ndërkombëtare.
“Unë druaj në hapat që do të ndodhin tash e tutje. Sepse referenca në rezolutën 12 44 dhe referenca vetëm në marrëveshjen e vitit 2013, e cila në momentin që është ratifikuar në Kuvend ka marrë statusin e një marrëveshje ndërkombëtare, druaj që mund të gjendet rrugë që eventualisht Gjykata Kushtetuese të mos lëshohet në analizën përmbajtjesorë të këtij dokumenti”, ka thënë Selmanaj për Nacionalen.
“Kjo më pasë na sjell në situata shumë të vështira. Sepse jurisprudenca kushtetuese që ne kemi ndërtuar në Kosovë dhe praktikisht kushtetuta që kemi, Gjykata Kushtetuese nuk ka mandat të trajtojë substancën e marrëveshjeve ndërkombëtare. Pra, marrëveshjet ndërkombëtarë janë mbi Kushtetutën e Kosovës dhe si e tillë Gjykata Kushtetuese nuk lëshohet në interpretim”, ka thënë ai.
