Deputetja e Partisë Demokratike të Kosovës, Ganimete Musliu ka thënë se sot ka bojkotuar adresimin e presidentes Vjosa Osmani në Kuvendin e Kosovës pasi sipas saj, Osmani “nuk mund të shërohet nga urrejtja patetike ndaj një epoke te lavdishme të historisë”.
Musliu theksoi se me fjalimin e saj presidentja sot e dëshmoi që nuk mund të jetë më shumë se një Vjosë.
“Vjosa Osmani edhe sot e dëshmoj qe nuk mund të jetë më shumë se një Vjosë. Kur flitet për historinë e Kosovës e nuk përmendet emri i Presidentit qe shpalli Pavarsinë e Kosovës, Presidentit Hashim Thaçi, kjo tregon injorancën dhe urrejtjen patetike të një gruaje të llastuar si Vjosa. Prandaj unë sot nuk bojkotova adresimin e Presidentit te shtetit tim, bojkotova fjalimin e nje gruaje qe nuk mund të shërohet nga urrejtja patetike ndaj një epoke te lavdishme të historisë”, tha Musliu në Facebook.
Kujtojmë që sot fjalimin e presidentes Vjosa Osmani para deputetëve e bojkotuan Partia Demokratike e Kosovës dhe Aleanca për Ardhmërinë e Kosovës.
