Zëvendësministri i Infrastrukturës, Hysen Durmishi ka njoftuar se në Platformën e-Kosova tani kanë publikuar shërbimin për aplikim dhe ndarje të termineve për provimin teorik dhe praktik për Patent Shofer.
Ai ka thënë se që nga sot përmes platformës së E-Kosova, fletëpagesat mund të realizohen në mënyrë digjitale.
“Me qëllim të zbatimit të zotimit për transparencë të plotë, në kuadër të MMPHI-së, në bashkëpunim me ASHI, kemi lansuar projektin lidhur me aplikimin dhe ndarjen e termineve per provimin teorik dhe praktik për Patent Shofer. Prej sot, përmes platformës së E-Kosova, fletëpagesat mund të realizohen në mënyrë digjitale. Si Ministri jemi kujdesur që deri në finalizimin e plotë të digjitalizimit, të drejtën e aplikimit qytetarët e kanë edhe përmes zyreve në njësitë rajonale”, ka shkruar ai.
Tutje ai ka thënë se ky projekt synon lehtësimin e procedurave të aplikimit për patentë shofer për qytetarët e vendit.
“Ky është një hap tjetër i domosdoshëm e i rëndësishëm drejt digjitalizimit si reformë e rëndësishme për rritjen e cilësisë, efikasitetit dhe transparencës”.
