Policia e Kosovës ka dhënë detaje shtesë në raportin 24-orësh në lidhje me bastisjet që janë kryer të premten së bashku me prokurorinë në tri lokacione në Pejë kundër veprimtarive të strukturave ilegale.
Në Gorazhdec është mbyllur komuna ilegale e Pejës, në Osojanë komuna paralele e Istogut dhe në Videjë komuna paralele e Klinës.
Në këto ndërtesa janë gjetur edhe dokumente e gjësende të tjera të cilat janë sekuestruar nga policia.
Në raportin e policisë thuhet se në Videjë gjatë kontrollit janë hasur dokumente të ndryshme që janë në kundërshtime me ligjet e Republikës se Kosovës të cilat kanë logo të Serbisë dhe strukturave ilegale.
“Në cilësinë e provave materiale janë konfiskuar: 2 kompjuter llaptop, 4 telefona, 2 vula, 1 usb, sasi e konsiderueshme e dokumenteve dhe inventar”, thuhet në raport.
Ndërkaq në Gorazhdec gjatë kontrollit në cilësinë e provave materiale janë konfiskuar 5 monitorë të kompjuterit, 4 printer dhe fotokopje, 1 makinë shkrimi e dorës, 1 TV, 4 telefona dhe dokumente të ndryshme.
Ndërkaq në fshatin Osojanë në cilësinë e provave materiale janë sekuestruar i gjithë inventari që gjendej në objekt dhe është bërë mbyllja e objektit.
“Lidhur me rastin është intervistuar në cilësi të dyshuarit një mashkull serb-kosovar dhe i njëjti pas intervistimit me vendim të prokurorit është liruar në procedurë të rregullt”, thuhet në raport.
