Ministria e Mbrojtjes së Mbretërisë së Bashkuar i është përgjigjur deklaratës së kryeministrit Albin Kurti, i cili kërkoi shtimin e trupave britanikë në Kosovë ‘për të parandaluar një luftë në Ballkanin Perëndimor’.
Në një përgjigje nga Ministria e Mbrojtjes në Mbretërinë e Bashkuar, një zëdhënës i kësaj ministrie thotë se MB vazhdon të jetë mbështetës i sovranitetit dhe pavarësisë së Kosovës dhe se aktualisht është e vendosur në Kosovë.
“Mbretëria e Bashkuar vazhdon të ofrojë mbështetje aktive për sovranitetin dhe pavarësinë e Kosovës dhe ne po luajmë një rol jetik në ruajtjen e stabilitetit në Ballkanin Perëndimor. Trupat e Mbretërisë së Bashkuar janë aktualisht të dislokuara si pjesë e misionit paqeruajtës prej 4000 trupash të NATO-s në Kosovë. Misioni kontribuon në ruajtjen e një mjedisi të sigurt dhe lirinë e lëvizjes për të gjitha komunitetet në Kosovë“, thuhet në përgjigjen ndaj komenteve të Kurtit i cili tha se Mbretëria e Bashkuar duhet të shtojë trupat në Kosovë në mënyrë të evitohet lufta në rajon.
“Britania duhet të dërgojë më shumë trupa në Kosovë për të parandaluar një luftë në Ballkanin Perëndimor”, ishte kjo deklarata që Kurti e dha në një intervistë për The Telegraph nga zyra e tij në Prishtinë.
Prania e NATO-s këtu është vetëm simbolike tha Kurti, duke argumentuar së ajo e vetme nuk do të mjaftonte për të parandaluar një pushtim nga Serbia. Komentet e tij erdhën pasi kreu i shtetit serb, Aleksandar Vuçiç nënkuptoi mes rreshtash në fillim të javës se një përpjekje për të rimarrë Kosovën edhe mund të ekzistonte.
Gazeta e njohur britanike, citon Vuçiç të pohonte se Beogradi do të “presë momentin më të mirë të mundshëm dhe ne do të shfrytëzojmë mundësinë tonë”.
I pyetur nëse Londra duhet të rrisë praninë e saj ushtarake në rajon, Kurti u përgjigj: “Britania e Bashkuar është pjesë e NATO-s dhe ata veprojnë në atë mënyrë. Por unë besoj se duhet të ketë më shumë trupa të NATO-s në Kosovë”.
“Aleanca ka 4,000 trupa në terren në Kosovë, megjithatë shefi i ekzekutivit Kosovar konsideron se vendi i tij “mund të mbrohet edhe më mire dhe se NATO mund dhe duhet të angazhohet më shumë në Kosovë si ushtarakisht ashtu edhe politikisht dhe kjo për shkak të kërcënimeve nga Beogradi. I kam kërkuar disa herë Brukselit shtimin e numrit të trupave në Kosovë, madje edhe përpara para pushtimit të Ukrainës nga Vladimir Putin në shkurt 2022”, tha Kurti.
Të njëjtën kërkesë, ai pohon ta ketë përsëritur pas incidentit të Banjskës vitin e kaluar, kur nga sulmi një grupi serbësh të armatosur humbi jetën një efektiv i Policisë së Kosovës. Rreth 200 trupa britanike u vendosën në rajon pas asaj ngjarjeje në përpjekje për të ulur tensionet, duke iu bashkuar 400 ushtarëve anglezë të stacionuar tashmë atje. Në kohën e episodit tronditës të dhunës, Alicia Kearns, kryetarja e komitetit të punëve të jashtme të parlamentit britanik, e kishte akuzuar Perëndimin për dështim në mbrojtjen e Kosovës nga agresioni serb e ai rus.
