Shqiptari Gezim Gashi nënshkruan marrëveshje për botimin e librit të tij debutues në SHBA

Amerika

Shqiptari Gezim Gashi nënshkruan marrëveshje për botimin e librit të tij debutues në SHBA

Më: 10 dhjetor 2020 Në ora: 16:30
Gezim Gashi

Muaji Mars i këtij viti e solli shqiptarin Gezim Gashi me një ligjëratë para studentëve nga e gjithë bota në Universitetin prestigjioz “Harvard”. Rrugëtimi i tij nga një refugjatë në një djalë të suksesshëm, ka bërë që rrëfimi i tij të jetë inspirues për dëgjuesit.

Gashi, një emër i suksesshëm në industrinë e muzikës në Los Angeles dhe duke qenë shqiptari i parë që është një ndër themeluesit e shkollës së artit në Amerikë, duket sikur pasion e ka të sfidojë veten.

Situata e krijuar nga pandemia, e ka bërë Gashin të gjejë veten edhe në një fushë tjetër të artit.

Falë ditëve të pandemisë, Gashi tashmë po sjell në treg librin e tij debutues. Ky libër i cili pritet të publikohet në vitit 2021, vjen pas marrëveshjes së nënshkruar me botuesin, me Agjencinë Kanadeze TSPA.

“Jam shumë i entuziazmuar që po nxjerr në treg një libër. Shumë shpejt do të ndaj me publikun titullin e librit, kopërtinën dhe të gjitha detajet tjera”, ka thënë Gashi i cili tutje nis dhe shpalos për KultPlus rrugëtimin e tij se si erdhi deri të ideja për librin.

“Unë isha në NYC dhe sapo i kisha thënë lamtumirë nënës dhe motrës sime që më vizituan në qytet, përpara se SH.B.A. të shpallnin një emergjencë kombëtare për shkak të Covid-19. NYC shpejt u bë një “qytet fantazmë” dhe të qenit vetëm në banesën time më bëri të kthehem te shkrimet për të gjetur paqen. (E cila është padyshim hera e parë që ka ndodhur ndonjëherë.) Kjo ishte diçka që me të vërtetë më pëlqente ta bëja, 30 minuta në një orë çdo mbrëmje para se të flija dhe vazhdova ta bëja atë në Los Angeles, NYC (Verë 2020) dhe Suedi”, tregoi Gashi procesin e të shkruarit.

Ndërsa disa javë më parë, ai e ndjeu se këto shkrime duhet t’i ndajë me publikun.

“Disa javë më parë, me të vërtetë e ndjeva – kjo është diçka që duhet ta ndaj … Ky do të ishte një libër i shkëlqyeshëm! Dhe … Më në fund mund t’ju them se – Unë kam nënshkruar një marrëveshje botimi me Agjencinë Kanadeze TSPA dhe do të nxjerr librin tim të parë në 2021! Jam kaq i emocionuar.”

Libri synon të përcjellë një mesazh tek lexuesit, e Gezimi nisur nga rrugëtimi i tij jetësorë beson që ky mesazh vjen i qartë dhe i fuqishëm.

“Përmes librit tentoj të përcjell një mesazh të qartë. Si të keni besim në vetveten dhe si të arrini sukses. Unë vijë nga Akllapi, ndërsa jam lindur në Prishtinë, ndërsa në Suedi kemi migruar me familje në vitin 1992. Sukseset dhe puna më kanë sjell në Amerikë, ku mundohem që çdo ditë të jap më të mirën time që ta bëj edhe vendin tim krenarë”, thotë Gashi. 

Krejt për fund, ai ka treguar që do të jetë i përmbushur vetëm në momentin që libri do të vijë edhe në gjuhën shqipe e për të cilën gjë është duke punuar.

“Libri do të vijë edhe në shqip, jam i bindur. Agjencia TSPA ka punuar me shumë best selling author në Amerikë dhe janë duke bërë një punë të mrekullueshme që librin tim ta promovojnë sa më shumë në SHBA. Ky libër pritet të prezantohet në gjithë botën dhe uroj që pas përfundimit të Covid-19 të dal të takoj sa më shumë njerëz. Por, për momentin dua të ju them të gjithëve që shkoni ëndrrës pas, mbani shpresa dhe jetoni secilën ditë në mënyrën më të mirë”, ka përfunduar kështu Gashi.

Shfaq komentet
comments powered by Disqus
Sot mund të lexoni Shfletoni kopertinat