Ekspertët kanë bërë thirrje për kërkime të mëtejshme në marketingun e veturave pasi analiza e të dhënave të aksidenteve në Mbretërinë e Bashkuar sugjeroi se drejtuesit e markave të caktuara kanë më shumë gjasa se të tjerët të shkaktojnë aksidente.
Një studim i më shumë se 400,000 aksidenteve rrugore në Mbretërinë e Bashkuar zbuloi se kur "manovrat e rrezikshme ose agresive" luanin rol në aksident, kishte një ndryshim të rëndësishëm statistikor në fajin e shoferit midis markave të ndryshme.
Ngasja e dyshimtë – si shpejtësia, vozitja në dritë të kuqe, parakalimi në vija të bardha të dyfishta ose injorimi i vendkalimit të thjeshtë të këmbësorëve – kishte më shumë gjasa të ishte një faktor kur përfshiheshin një Subaru, Porsche dhe BMW sesa një Skoda ose Hyundai, raportoi Guardian.
Duke marrë parasysh edhe gjëra të tjera si mosha e shoferëve dhe llojet e rrugëve, studiuesit supozuan se faji mund të ishte marka, në një punim të botuar në Journal of Social Marketing.
Një zëdhënës në Porsche ka thënë: “Siguria në timon ka një rëndësi të madhe për ne”, duke shtuar se çdo blerës ftohet për një eksperiencë me veturë “që të kuptojë komplet veturën e tij dhe të përsos aftësitë e tij të ngasjes”.
Kurse një zëdhënës i Subarus ka deklaruar se marka ka ndërruar fokusin që prej viteve 2011-2015 kur studimi ka marrë të dhënat. “Qëllimet tona janë siguria, kapaciteti dhe besueshmëria”.
E, një zëdhënës në BMW ka theksuar se “në BMW asgjë nuk është më e rëndësishme se siguria... Kjo reflektohet në mënyrën si e bëjmë shitjen e veturave në Britani dhe ne shpenzojmë një kohë të mirë dhe kujdes në përmbushjen e standardeve të caktuara nga Autoriteti i Standardeve”.
