Konsumatorët amerikanë po blejnë automjete elektrike (EV) – por, jo me ritmin që parashikuan disa analistë. Ekzistojnë disa arsye thelbësore të cilat e pengojnë konsumatorin mesatar të mos kalojë nga benzina në makinë elektrike.
Gjatë viteve të fundit, analistët kanë mbrojtur automjetet elektrike si e ardhmja e transportit – në të cilën amerikanët do të zhyten me padurim dhe me shpejtësi.
Tregu i EV me të vërtetë po zgjerohet, por 'revolucioni' i automjeteve elektrike në SHBA duket se po ndodh shumë më ngadalë se sa prisnin disa analistë dhe prodhues të makinave.
Që nga viti 2016, shitjet e makinave EV në SHBA janë rritur – nga gati 65,000 automjete të shitura në 2017, në më shumë se 800.000 automjete në 2022.
Të dhënat nga firma analitike automobilistike Motor Intelligence treguan se shitjet e EV u rritën 51% në gjysmën e parë të 2023, pas trend në rritje.
Megjithatë, këto fitime janë ende një rënie nga rritja prej 71% e vitit të kaluar në të njëjtën periudhë kohore. Dhe Tesla, e cila kryeson tregun me më shumë se gjysmën e të gjitha shitjeve të automjeteve elektrike, kohët e fundit raportoi fitimet e saj më të ulëta tremujore në dy vjet, duke çuar në një rënie prej 138 miliardë dollarësh (111.4 miliardë funte) në vlerën e aksioneve të kompanisë.
Nuk është se amerikanët nuk duan të blejnë automjete elektrike, thotë Elizabeth Krear, nënkryetare e Electric Vehicle Practice në firmën e inteligjencës së konsumatorit J.D. Power.
"Ne anketojmë mbi 2.000 blerës të automjeteve të reja për të vlerësuar interesin e tyre për EV-të çdo muaj," thotë ajo. "Në tetor, përqindja e blerësve të automjeteve të reja me shumë gjasa që të konsiderojnë një automjet elektrik me bateri të plotë arriti një maksimum historik prej 29.2%. Pra, pothuajse një në çdo tre blerës të automjeteve të reja ka shumë të ngjarë të konsiderojë një EV për blerje”.
Megjithatë, disa arsye thelbësore kanë ngadalësuar përdorimin e automjeteve elektrike për shoferët amerikanë.
Kryesorja midis këtyre pengesave është përballueshmëria e kostos. Edhe pse çmimet ulen dhe SHBA-ja prezanton kredi tatimore, EV-të mbeten shumë më të shtrenjta se automjetet tjera.
Arsyeja tjetër është mbushja e këtyre automjeteve e cila paraqet një sfidë për blerësit. Këto automjete kanë nevojë për orë të tëra për t’u mbushur, dhe, këtë lloj kohë amerikanët e zakonshëm nuk e kanë.
Ekspertët pajtohen se krijimi i një infrastrukture të fuqishme të stacioneve publike të mbushjes është çelësi për adoptimin masiv të EV. Por krijimi i asaj infrastrukture ngec. Stacionet janë të pakta, veçanërisht në komunitetet me të ardhura të ulëta dhe minoritare.
Një shtesë, jo një zëvendësim - Për më tepër, edhe konsumatorët që kanë blerë automjete elektrike nuk po i zëvendësojnë plotësisht automjetet me benzinë. Në vend që të kalojnë plotësisht në energjinë elektrike, konsumatorët shpesh janë duke plotësuar flotën e tyre personale, pra shumica e individëve që blejnë makina elektrike zotërojnë gjithashtu një automjet me motor me djegie të brendshme.
Tani për tani, edhe pse prodhuesit e makinave mund të kenë mbivlerësuar shpejtësinë me të cilën amerikanët do të adoptonin automjetet elektrike, ekziston ende besimi i përhapur si nga prodhuesit ashtu edhe nga punëtorët se EV-të janë e ardhmja e industrisë së automobilave.
