LIVE: SHBA i jep goditjen e fuqishme Hamasit, zbulohen detajet e fundit nga lufta në Gaza

Shtetet e Bashkuara njoftuan të martën se kanë vendosur sanksione ndaj zyrtarëve të Hamasit dhe pjesëtarëve të grupit Xhihadi Islamik Palestinez që merren me transferimin e parave nga Irani për në Gazë, si dhe një shërbimi libanez që bën transferim parash.

Sanksionet e njoftuara nga departamenti i Thesarit, të bashkërenduara me Britaninë e Madhe, janë si kundërpërgjigje ndaj sulmit të befasishëm të Hamasit më 7 tetor ndaj Izraelit, që la të paktën 1200 të vdekur ose të rrëmbyer. Sanksionet i ndalojnë qasjen individëve e kompanive në prona dhe llogari bankare amerikane dhe ua ndalojnë të punojnë me shtetasit amerikanë.

Ky raund sanksionesh dhe ato të mëparshmit kundër Hamasit dhe grupeve të lidhura me të, kanë për qëllim të parandalojnë përdorimin e sistemit ndërkombëtar financiar nga militantët e Hamasit dhe bashkëpunëtorët e tyre, sipas Departamentit të Thesarit.

Departamenti i Shtetit po ashtu vendosi në listën e sanksioneve diplomatike drejtuesin ushtarak të grupit “Xhihadi Islamik Palestinez”.

Në një deklaratë të dërguar me email, Sekretarja e Thesarit Janet Yellen tha se “së bashku me partnerët tanë po veprojmë me vendosmëri për ta dëmtuar infrastrukturën financiare të Hamasit, për t’u ndërprerë financimin nga jashtë dhe bllokuar burime të reja për financimin e veprimeve të tyre të tmerrshme.”

Sekretari i shtetit Antony Blinken tha se “do të vazhdojmë të punojmë me partnerët dhe aleatët tanë për t’ia ndërprerë Hamasit kanalet për financimin e terrorizmit.”

Shtëpia e Bardhë tha se deri tani nuk ka gjetur informacion që Irani, sponsori kryesor financiar dhe ushtarak i Hamasit, të ishte drejtpërdrejt i përfshirë në operacionin e Hamasit kundër Izraelit.

Megjithatë, Shtetet e Bashkuara ndërmorën gjatë dy javëve të fundit tre sulme ndaj depove të armatimit të lidhura me Iranin brenda Sirisë për t’u hakmarrë ndaj mbi 50 sulmeve me raketa dhe dronë të grupeve militante ndaj bazave amerikane në Irak dhe Siri që nga 7 tetori, gjatë të cilave disa amerikanë janë lënduar lehtë.

Presidenti Joe Biden dhe zyrtarë të tjerë të administratës së tij kanë vizituar Lindjen e Mesme për të treguar përkrahjen e tyre për Izraelin dhe janë përpjekur të zbusin tensionet në luftën që po përshkallëzohet ndërmjet Izraelit dhe Hamasit. Por këto përpjekje nuk kanë arritur ndonjë përparim.

Mbi 11,000 palestinezë, prej të cilëve dy të tretat gra dhe fëmijë, janë vrarë që nga fillimi i luftës, sipas Ministrisë së Shëndetësisë së Gazës të kontrolluar nga Hamasi, e cila nuk bën dallim midis civilëve të vrarë dhe militantëve.

Sekretari i jashtëm britanik David Cameron tha se “palestinezët janë gjithashtu viktima të Hamasit. Solidarizohemi me ta dhe do të vazhdojmë të mbështesim pauzat humanitare që mundësojnë depërtimin e ndihmës jetike në Gazë.”

Britania e Madhe të martën po ashtu vuri sanksione ndaj katër drejtuesve të lartë të Hamasit dhe dy financuesve të organizatës.

Drejtuesi i krahut ushtarak të Hamasit, Mohammed Deif tha se sulmi i 7 tetorit ishte kundërpërgjigje ndaj bllokadës 16 vjeçare të Gazës, sulmeve izraelite në qytetet e Bregut Perëndimor gjatë vitit të fundit, sulmeve të shpeshta të kolonëve ndaj palestinezëve dhe shtimin e vendbanimeve të tyre, ndër arsyet e tjera.

Kryeministri izraelit Benjamin Netanyahu, që shpalli gjendje lufte në Izrael, tha se ushtria e tij do të përdorte tërë fuqinë e vet për të shkatërruar aftësitë e Hamasit. “Të gjitha vendet ku fshihet Hamasi, nga të cilat vepron,” tha ai, “do t’i shndërrojmë në gërmadha”./VOA

Agjencia e Kombeve të Bashkuara për Ndihmë dhe Punë për Refugjatët Palestinezë (UNRWA) dhe Organizata Botërore e Shëndetësisë (OBSH) janë tërhequr nga Gaza, njoftoi El Arabiya TV, duke cituar Ministrinë palestineze të Shëndetësisë.

“UNRWA dhe OBSH nuk ofrojnë më shërbime në Rripin e Gazës. Agjencitë e OKB-së janë pajtuar me Izraelin dhe janë larguar nga Rripi i Gazës”, tha Drejtori i Përgjithshëm i Ministrisë, Munir Al-Brush.

Ai shtoi se numri i njerëzve të vrarë në sulmet izraelite u rrit në 12 mijë dhe rreth 30 mijë janë plagosur, shkruan cnbc.

Në fakt, autoritetet palestineze kanë njoftuar se mbi 11 mijë njerëz janë vrarë ndërsa në radhët e izraelitëve kanë vdekur mbi 1200 persona.

Më 7 tetor, grupi palestinez Hamas kreu një sulm të befasishëm me raketa mbi Izraelin nga Rripi i Gazës, si dhe një inkursion në territorin izraelit kur një numër i madh njerëzish u vranë dhe u rrëmbyen.

Izraeli u përgjigj me sulme ajrore, një bllokadë totale të Rripit të Gazës dhe një operacion tokësor. 

Ministri i mbrojtjes i Izraelit, Yoav Gallant, ka thënë në një konferencë shtypi këtë mbrëmje se Hamasi ka "humbur kontrollin" në veri të Gazës, përcjell Bota sot.

Ai shtoi se ushtria izraelite ka bërë fitime të rëndësishme dhe ka kontrolluar qendrën e qytetit të Gazës, në veri. Për ditë të tëra ushtria izraelite ka rrethuar Spitalin Al-Shifa, në qytet, për të cilin Izraeli thotë se ndodhet mbi një bazë ushtarake të Hamasit. Hamasi e mohon këtë, por në orën e fundit SHBA-të thonë se kanë inteligjencë që mbështesin pretendimin e Izraelit.

“Hamasi ka humbur kontrollin, dhe në fakt, ne jemi në kontroll në të gjithë teatrin qendror të Rripit të Gazës, në veri të Rripit dhe në veçanti në qytetin e Gazës”, tha ai.

Por kur u pyet se sa mund të zgjasë lufta, Gallant tha: “Po flasim për muaj të gjatë, jo për një apo dy ditë”.

Teksa sezoni i shirave po fillon, frika po rritet se përmbytjet mund të pushtojnë sistemin e ujërave të zeza të Gazës dhe të përhapin sëmundje.

Organizata Botërore e Shëndetësisë tha javën e kaluar se Gaza përballet me një rrezik në rritje të sëmundjeve për shkak të një sistemi shëndetësor të ndërprerë, qasjes së kufizuar në ujë të pastër dhe grumbullimit në strehimore.

Dhe sot, që solli reshje të mëdha shiu në Gaza, OBSH tha se përmbytjet mund të pushtojnë një sistem tashmë të varfër dhe të dëmtuar të ujërave të zeza, raporton Skynews.

“Ne kemi pasur tashmë shpërthime të sëmundjeve diarreike”, tha zëdhënësja e OBsH-së Margaret Harris.

Ajo shtoi se kishte më shumë se 30 mijë raste të diarresë – në një periudhë kur OBSH normalisht do të priste 2 mijë raste.

“Ne kemi shumë dëme infrastrukturore. Kemi mungesë të ujit të pastër. Kemi njerëz shumë, shumë të mbledhur bashkë. Kjo është një arsye tjetër pse po kërkojmë që të ndodhë një armëpushim tani”, tha ajo.

Një zëdhënës i Këshillit Norvegjez të Refugjatëve deklaroi se fillimi i sezonit të shirave mund të shkaktojë “javën më të vështirë në Gaza që nga fillimi i përshkallëzimit”.

Organizata bamirëse ndërkombëtare ActionAid tha se lutjet për të lejuar karburantin në Gaza për të “mbajtur funksionimin e spitaleve dhe impianteve të ujit dhe kanalizimit” janë “injoruar plotësisht”.

“Me reshjet e dendura në rritje të përmbytjeve në të gjithë Gazën, rreziku i sëmundjeve dhe vdekjeve nga sëmundjet që vijnë nga uji mund të rritet në mënyrë eksponenciale pasi strehimoret mbeten jashtëzakonisht të mbipopulluara”, tha Riham Jafari, koordinatore e avokimit dhe komunikimit për ActionAid Palestine.

Krahu i armatosur i Hamasit ka thënë të hënën se ishte gati të lironte 70 pengje izraelite, kryesisht gra dhe fëmijë, në këmbim të një armëpushimi pesë-ditor në Gaza.

Sipas mediave të huaja, Abu Ubaida, zëdhënësi i Brigadave al-Qassam, tha në një regjistrim audio të postuar në Telegram, dhe të raportuar nga Reuters, se negociatat janë zhvilluar me ndërmjetësit e Katarit.

“Javën e kaluar pati një përpjekje nga vëllezërit e Katarit për të liruar robërit e armikut – nga gratë dhe fëmijët – në këmbim të lirimit të 200 fëmijëve palestinezë dhe 75 grave të ndaluara nga armiku”, citohet të ketë thënë Ubaida.

Armëpushimi i propozuar, sipas Ubaida, “duhet të përfshijë një armëpushim të plotë dhe të lejojë ndihmë humanitare kudo në Rripin e Gazës”, raportoi Reuters.

Siç kujtojnë mediat, rreth 240 pengje u zunë rob gjatë sulmit terrorist të Hamasit në Izrael më 7 tetor, nga i cili u vranë rreth 1,400 njerëz.

Dhe ndërsa Hamasi liroi katër pengje muajin e kaluar me ndërmjetësimin e Katarit dhe Forcat Mbrojtëse të Izraelit liruan një tjetër, asnjë peng tjetër nuk është liruar.

Në regjistrimin audio, Ubaida akuzoi gjithashtu Izraelin për “zvarritje dhe shmangie” të një marrëveshjeje, raportoi Reuters.

Raportet e mëparshme thanë se Hamasi kishte propozuar shkëmbimin e 50 pengjeve izraelitë për një armëpushim pesë-ditor në Gaza – një ofertë e refuzuar nga Izraeli.

The Guardian, e cila citoi tre burime të njohura me ato bisedime, tha se marrëveshja përfshinte lirimin e fëmijëve, grave, të moshuarve dhe njerëzve të sëmurë në këmbim të një pauze në bombardimet e Izraelit të Gazës, për të cilën Hamasi tha se do t’i mundësonte “mbledhjen e pengjeve”.

Përpjekjet e fundit të negociatave për armëpushimin vijnë në mes të një numri në rritje të vdekjeve në Gaza, për të cilin ministria e shëndetësisë e Rripit thotë se tani tejkalon më shumë se 11,000 njerëz.

Shtetet e Bashkuara njoftuan raundin e tretë të sanksioneve që synojnë individë të lidhur me Hamasin, përcjell Bota sot.

Masa kishte në shënjestër në mënyrë specifike Mahmoud Khaled Zahhar, një anëtar i lartë dhe bashkëthemelues i Hamasit dhe anëtarë të Xhihadit Islamik Palestinez (PIJ). Kompania e këmbimit të parave me bazë në Liban, Nabil Chouman & Co, ishte gjithashtu në shënjestër, së bashku me pronarin dhe themeluesin e saj.

Sekretari amerikan i Shtetit Antony Blinken tha se mbështetja e Iranit mundëson aktivitetet e Hamasit dhe PIJ-së, duke përfshirë "transferimin e fondeve dhe sigurimin e armëve dhe trajnimin operacional".

“Mbështetja e Iranit, kryesisht përmes Korpusit të Gardës Revolucionare Islamike, mundëson aktivitetet terroriste të Hamasit dhe PIJ-së”, tha Blinken në një deklaratë.

Mjekët pa Kufij thonë se plumbat u qëlluan në një nga tre ambientet e tyre të vendosura pranë spitalit al-Shifa, ku më shumë se 100 njerëz – përfshirë stafin dhe familjet e tyre – janë strehuar.

Grupi, i cili njihet edhe me akronimin francez MSF, shtoi se atyre që strehoheshin u ka mbetur pa ushqim.

“Ne jemi përpjekur t'i evakuojmë ata për tre ditët e fundit. MSF po i kërkon ushtrisë izraelite dhe Hamasit për një kalim të sigurt që ata të largohen nga epiqendra e luftimeve intensive që po vazhdojnë aktualisht në qytetin e Gazës, "tha ajo në X.

MSF shtoi se mijëra njerëzve të bllokuar në spitale dhe vende të tjera në qytetin e Gazës duhet t'u jepet një kalim i sigurt dhe përsëriti thirrjet për një armëpushim të menjëhershëm.

Kryeministri izraelit Benjamin Netanyahu bëri një paralajmërim të frikshëm për Amerikën se mund të jetë “e radhës” nëse ushtria izraelite (IDF) nuk e shkatërron Hamasin.

Sipas Fox News, ai theksoi se “ne duhet të fitojmë jo vetëm për ne, por për hir të Lindjes së Mesme, për hir të fqinjëve tanë arabë”.

“E dini çfarë, për hir të banorëve të Gazës që janë mbajtur nga kjo tirani e errët që ka brutalizuar dhe nuk u solli atyre asgjë përveç gjakderdhjes, varfërisë dhe mjerimit”, citohet të ketë thënë Netanyahu të hënën.

Veç kësaj, ai mendon se “ne duhet të fitojmë për të mbrojtur Izraelin. Ne duhet të fitojmë për të mbrojtur Lindjen e Mesme. Ne duhet të fitojmë për hir të botës së qytetëruar. Kjo është beteja që po luftojmë dhe po zhvillohet tani. Nuk ka asnjë zëvendësim për atë fitore”.

Por ai nuk është ndalur me kaq.

“Nëse nuk fitojmë tani, atëherë Evropa është e radhës dhe ju jeni të radhës. Dhe ne duhet të fitojmë”, shtoi ai më vonë.

“… Çdo amerikan, çdo vend i civilizuar do të jetë nën rrezik. Ne duhet të fitojmë. Nuk ka asnjë zëvendësim për fitoren. Fitore totale”.

Netanyahu përsëriti se presidenti Joe Biden dhe administrata e tij kanë qenë “shumë mbështetëse” për Izraelin në luftën e tij kundër Hamasit dhe përmendi respektimin e kërkesave për sigurimin e një korridori të sigurt për civilët palestinezë që të largohen nga Gaza dhe për dërgimin e ndihmave humanitare.

Por ai përsëriti gjithashtu zotimin e tij kundër një armëpushimi pa lirimin e pengjeve, duke e quajtur atë një “dorëzim ndaj Hamasit” nëse robërit izraelitë nuk kthehen të sigurt.

Ndërsa ne kemi raportuar për situatën humanitare në spitalin më të madh të Gazës, Al-Shifa, ka disa objekte të tjera shëndetësore që vuajnë për shkak të mungesës së burimeve dhe pasigurisë.

Organizata Botërore e Shëndetësisë (OBSH) tha se mbi gjysma e spitaleve të Gazës - 22 nga 36 - tani janë "jofunksionale".

Duke postuar në X, OBSH tha se kjo ishte për shkak të "mungesës së karburantit, dëmtimit, sulmeve dhe pasigurisë".

Ai tha se 14 spitalet e mbetura kanë "mezi furnizime të mjaftueshme" për të mbështetur operacionet e shpëtimit dhe për të ofruar kujdes spitalor, dhe ai bëri thirrje për një armëpushim të menjëhershëm.

Udhëheqësi Houthi i Jemenit është zotuar të vazhdojë sulmet ndaj Izraelit, duke thënë se forcat e tij do të kërkojnë anijet izraelite në Detin e Kuq.

Abdulmalik al Houthi tha se forcat e tij do t'i kushtojnë vëmendje "veçanërisht" Bab al Mandab - një ngushticë që ndan Jemenin dhe Xhibutin, duke lidhur Detin e Kuq me Gjirin e Adenit dhe Oqeanin Indian.

“Sytë tanë janë të hapur për të monitoruar dhe kërkuar vazhdimisht çdo anije izraelite në Detin e Kuq, veçanërisht në Bab al-Mandab dhe pranë ujërave rajonale të Jemenit”, tha ai.