Mbreti i Arabisë Saudite, Salman bin Abdulaziz, ka thënë se bashkësia ndërkombëtare duhet të marrë përgjegjësitë e veta për të ndalur “krimet brutale” kundër palestinezëve në Gaza.
Në një fjalim të lexuar në emër të tij nga ministri saudit i mediave, Salman al-Dosari për të shënuar fillimin e muajit të shenjtë mysliman të Ramazanit, mbreti tha gjithashtu se komuniteti ndërkombëtar duhet të ndihmojë në sigurimin e kalimeve të sigurta humanitare në enklavë, shkruan Sky News.
Shtetet e Bashkuara kishin udhëhequr diplomacinë prej muajsh për të detyruar Arabinë Saudite të normalizonte marrëdhëniet me Izraelin.
Por muajin e kaluar Arabia Saudite i tha ShBA-së se nuk do të hapë marrëdhënie diplomatike me Izraelin nëse nuk njihet një shtet i pavarur Palestinez në kufijtë e vitit 1967 me Jerusalemin Lindor si kryeqytet.
