Kryeministri i Sri Lankës, Ranil Wickremesinghe ka deklaruar se vendi i tij ka falimentuar pasi po vuan krizën më të keqe financiare në dekada duke braktisur miliona njerëz në luftën e përditshme për ushqime, ilaçe dhe karburant.
Wickremesinghe u tha ligjvënësve se negociatat me Fondin Monetar Ndërkombëtar (FMN) për të ringjallur ekonominë që ka përfunduar në kolaps, janë tejet të vështira sepse kombi i Azisë Jugore prej 22 milionë banorësh ka hyrë në bisedime si një vend i falimentuar dhe jo si një vend në zhvillim.
“Ne po marrim pjesë tani në negociata si një vend i falimentuar. Prandaj, ne duhet të përballemi me një situatë më të vështirë dhe më të ndërlikuar se negociatat e mëparshme. Për shkak të gjendjes së falimentimit në të cilën ndodhet vendi ynë, duhet t’i paraqesim një plan për qëndrueshmërinë e borxhit tonë (FMN) Vetëm kur ata janë të kënaqur me atë plan mund të arrijmë një marrëveshje”, u shpreh kryeministri i Sri Lankës.
Sri Lanka është në mes të krizës së saj më të keqe financiare në shtatë dekada, pasi rezervat e saj valutore kanë rënë në nivele rekord, me dollarin që po mbaron për të paguar importet, përfshirë ushqimin, ilaçet dhe karburantin. Ndërkaq Presidenti Gotabaya Rajapaksa shkroi të mërkurën në Twitter se ai kishte kërkuar ndihmë nga presidenti rus Vladimir Putin.
Në disa qytete të mëdha, përfshirë kryeqytetin e Sri Lankës, Colombo, qindra njerëz vazhdojnë të qëndrojnë në radhë për orë të tëra për të blerë karburant, ndonjëherë duke u përplasur me policinë dhe ushtrinë. Shkollat janë pezulluar dhe karburantet janë kufizuar në shërbimet e tyre.
Për muaj të tërë, një numër i madh i Sri Lankasve kanë bërë thirrje që Rajapaksa të japë dorëheqjen për akuzat për keqmenaxhimin ekonomik.
