LIVE: Çfarë po ndodh në Ukrainë, Rusia pretendon sulm masiv raketor – Territori ukrainas i mbushur me mina ruse

Zelensky: Ushtria ukrainase zmbraps me sukses sulmet ruse në Bakhmut e Soledar.

Presidenti ukrainas Volodymyr Zelensky tha sonte se ushtria ukrainase po zmbraps sulmet ruse në qytetin Bakhmut në lindje të rajonit Donbas dhe po mban pozicionet e saj në qytetin e afërt Soledar, por në "kushte shumë të vështira".

“Bakhmut vazhdon, pavarësisht gjithçka. Edhe pse shumica e qytetit është shkatërruar nga sulmet ruse, ushtarët tanë zmbrapsin përpjekjet e vazhdueshme ruse për të avancuar”, tha Zelensky.

Ai theksoi se Soledar po mbahet, edhe pse ka “shkatërrim edhe më të madh”, duke shtuar se situata është shumë e vështirë.

Forcat e presidentit rus Vladimir Putin mund të kenë humbur tashmë një betejë kyçe në Ukrainë, tha të dielën një ish-komandant ushtarak rus.

Luftimet mbeten të përqendruara në Ukrainën juglindore dhe në qytetin e Bakhmut, i cili ka qenë skena e disa prej betejave më intensive të luftës për muaj të tërë.

Trupat ruse në rajon udhëhiqen nga grupi Wagner, një forcë ushtarake private e themeluar nga aleati i Putinit, Yevgeny Prigozhin, i akuzuar gjerësisht për abuzime të rënda të të drejtave të njeriut dhe sulme ndaj civilëve.

Luftimet në Bakhmut, shtëpia e minierave që përmbajnë burime strategjike, duke përfshirë kripën dhe gipsin, vazhduan gjatë fundjavës. Rusia duket se ka përparuar në Soledar aty pranë dhe ekspertët ushtarakë rusë kanë sugjeruar se rusët mund të rrethojnë ushtrinë ukrainase atje.

Megjithatë, edhe një fitore taktike në Bakhmut mund të mos e kthejë rrjedhën e luftës në favor të Kremlinit, tha Igor Girkin, një ish-komandant rus i njohur për rolin e tij në operacionin rus të vitit 2014 në Krime dhe rolin që luajti në rrëzimin e avionin e pasagjerëve të Malaysia Airlines. Girkin, i njohur gjithashtu si Strelkov, shkroi në Telegram se trupat e Putinit kishin humbur tashmë në një kuptim strategjik.

Girkin tha se një fitore ruse në Bakhmut ishte ende "shumë larg" dhe parashikoi se lufta do të zgjaste të paktën një muaj tjetër. Edhe nëse Rusia arrin një fitore taktike, tha ai, do të ishte një humbje strategjike, sepse burimet e shpenzuara do të kishin më shumë vlerë për objektivat e tjerë në Ukrainë.

"Edhe nëse trupat tona arrijnë një fitore taktike, ne kemi humbur tashmë strategjikisht, sepse kemi hedhur edhe një herë forcat dhe burimet tona më të mira drejt një qëllimi të padenjë," shkroi Girkin.

Ai shtoi se Shtabi i Përgjithshëm i Forcave të Armatosura Ruse ishte kryesisht fajtor për urdhërimin e pushtimit, por se grupi Wagner gjithashtu ndau fajin për lejimin e përdorimit të trupave të tij në këtë luftë.

“Një komandant që lejon që ushtarët e tij të shpërdorohen kaq pa mjeshtëri dhe pa fryt (madje edhe duke vepruar sipas urdhrave) nuk mund të konsiderohet në asnjë rast një udhëheqës i mirë ushtarak”, ka shkruar ai.

Ndërsa konflikti vazhdon, tensionet mbi Bakhmut rriten brenda udhëheqjes ruse. Sipas Institutit për Studimin e Luftës (ISW), një institut kërkimor me bazë në SHBA, grupi Wagner u përpoq të fajësonte Ministrinë ruse të Mbrojtjes për përparimin e ngadaltë në betejë.

Në një intervistë me median shtetërore ruse, Prigozhin thuhet se tha se ushtarët e Grupit Wagner kishin luftuar për të kapërcyer linjat ukrainase "për shkak të një sasie të pamjaftueshme të automjeteve të blinduara, municioneve dhe rezervave të predhave 100 mm", raportoi ISW.

Girkin, i cili është gjithnjë e më kritik ndaj lidershipit të Moskës, tha dje se lidershipi në Kremlin ishte ndarë për pushtimin pas lajmeve se Prigozhin kishte akuzuar oligarkët për diskreditim të grupit Wagner.

Ministria ruse e Mbrojtjes ka ndarë disa detaje të tjera të sulmit të pretenduar në një kazermë të përkohshme ukrainase, përcjell Bota sot.

Duke postuar në Telegram, departamenti tha: "Gjatë 24 orëve të fundit, asetet ruse të zbulimit zbuluan dhe konfirmuan me besueshmëri përmes disa kanaleve të pavarura vendosjen e përkohshme të personelit të AFU në qytetin e Kramatorsk.

“Në konviktin 28 kishte mbi 700 ushtarakë ukrainas dhe në konviktin 47 mbi 600 ushtarakë ukrainas.

"Si rezultat i një sulmi masiv raketor në këto lokacione të përkohshme të njësive AFU, mbi 600 ushtarakë ukrainas u vranë."

Ukraina nuk i është përgjigjur ende pretendimeve dhe Sky News nuk ka qenë në gjendje të verifikojë menjëherë pohimet nga Ministria Ruse e Mbrojtjes.

Shtabi i Përgjithshëm i Ushtrisë së Ukrainës raportoi se rusët vazhdojnë të pësojnë humbje të mëdha.

Nga ky shtab thanë se gjatë 5 janarit një tren-frigorifer plot me kufoma të ushtarëve të vrarë rusë, ka arritur nga Rostova në Don në rajonin Kemerovo, ku këto kufoma do t’ju dorëzohen morgjeve lokale.

Ushtria ukrainase që nga fillimi i luftës, vazhdon t’ia dorëzojë Rusisë trupat e ushtarëve të vrarë në luftime – si dhe duke ua dorëzuar edhe të gjitha gjësendet e tyre personale.

Në anën tjetër, Rusia është ajo që lëre që po kryen vrasje mbi civilë ukrainas, por edhe trupat e tyre po tenton t’i fshehë duke i hapur varreza masive nëpër pyje e në disa raste edhe i kanë djegur – për të fshehur gjurmë.

Kievi pretendon se nga fillimi i luftës në Ukrainë, janë vrarë mbi 110 mijë ushtarë rusë, kurse Moska vazhdimisht tenton t’i fshehë të dhënat sa i përket vrasjes së ushtarëve të saj në luftë.

Kryeministri i Ukrainës, Denys Shmyhal, ka thënë se si rezultat i luftës, Ukraina ka territor të madh të minuar – përkatësisht bëhet fjalë për 250 mijë kilometra katrorë (96,526 milje katrorë).

“Bëhet fjalë për territorin më të madh në botë të mbushur me mina”, shtoi Shmyhal – duke theksuar se mina janë vendosur nga ushtria ruse e Vladimir Putinit.

Sipas tij, këto fusha të minuara, janë një ekuivalent prej më shumë se 40 për qind të tërë territorit të Ukrainës.

“Kjo jo vetëm që e vështirëson udhëtimin e njerëzve, por gjithashtu shkakton pengesa për bujqësinë që është një nga industritë tona kryesore”, tha ndër tjera kryeministri ukrainas.

Kujtojmë që nga fillimi i luftës në Ukrainë, janë vrarë qindra mijëra ushtarë nga të dyja palët, kurse minat e vendosura nga rusët kanë bërë që numri i viktimave të rritet akoma më shumë.

Dy persona u vranë dhe trembëdhjetë të tjerë u plagosën pasi trupat ruse bombarduan qytetin Bakhmut, rajoni Donetsk.

“Sipas të dhënave të hetimit, trupat e Federatës Ruse kryen një seri tjetër sulmesh artilerie në qytetin Bakhmut ”, njoftoi Zyra e Prokurorit të Përgjithshëm në Telegram .

Një burrë 66-vjeçar dhe një grua 61-vjeçare kanë mbetur të vrarë si pasojë e sulmeve të fuqishme me mortaja në lagje të banuara. Trembëdhjetë persona të tjerë morën plagë nga shpërthimi i minës dhe predhave.

Shtëpi private, blloqe apartamentesh dhe objekte të tjera janë dëmtuar dhe shkatërruar.

Nën drejtimin procedural të zyrës së prokurorit rajonal të Donetskut, u filluan hetimet paraprake për shkelje të ligjeve dhe zakoneve të luftës (Pjesa 1, Pjesa 2 e nenit 438 të Kodit Penal të Ukrainës).

Prokurorët vazhdojnë të marrin të gjitha masat e mundshme për të dokumentuar krimet e luftës të kryera nga përfaqësuesit e forcave të armatosura të Federatës Ruse.

Siç raportohet, trupat ruse vranë dy civilë dhe plagosën shtatë të tjerë në rajonin e Donetsk më 6 janar.

Të shtunën, më 7 janar, në ditën e Krishtlindjes, bota ishte edhe një herë në gjendje të shihte se sa të rreme janë fjalët e çdo niveli që vjen nga Moska.

“Dhe, meqë ra fjala, bota edhe një herë ishte në gjendje të shihte sot se sa të rreme janë fjalët e çdo niveli që tingëllojnë nga Moska. Ata thanë diçka atje për një armëpushim të pretenduar… Por realiteti është se raketat ruse goditën sërish Bakhmutin dhe pozicionet e tjera të Ukrainës”, tha Presidenti i Ukrainës Volodymyr Zelensky.

Siç u përmend, vetëm dëbimi i pushtuesve rusë nga toka ukrainase dhe eliminimi i çdo mundësie për Rusinë për të ushtruar presion mbi Ukrainën dhe mbarë Evropën do të nënkuptojë rivendosjen e armëpushimit, sigurisë dhe paqes.

“Kjo është ajo për të cilën ne po punojmë, është pikërisht ajo që synon ndihma e partnerëve tanë dhe është pikërisht ajo që ka e gjithë bota e qytetëruar tani. Dhe falënderoj të gjithë ata që na ndihmojnë të mbrojmë pavarësinë e Ukrainës! Faleminderit të gjithëve që luftojnë dhe punojnë për vendin tonë! Sot jemi një hap më afër fitores sonë”, tha Zelensky.

Si përkujtim, mediat propagandistike ruse raportuan se presidenti i shtetit terrorist Vladimir Putin gjoja kishte urdhëruar vendosjen e një “regjimi armëpushimi” nga ora 12:00 e datës 6 janar deri në orën 24:00 të datës 7 janar, përgjatë gjithë linjës së kontaktit ndërmjet palëve në Ukrainë.

Nga ana e tij, Mykhailo Podolyak, këshilltar i shefit të zyrës së Presidentit të Ukrainës, tha se një “armëpushim i përkohshëm” është i mundur për Rusinë pasi të largohet nga territoret e pushtuara përkohësisht, sepse Ukraina nuk sulmon tokat e huaja dhe nuk vret civilë, por vetëm eliminon pushtuesit.

Nga ana tjetër, Instituti Amerikan për Studimin e Luftës deklaroi se armëpushimi i Putinit është një operacion informacioni.

Finlanda po përgatit një tjetër paketë ndihme mbrojtëse për Ukrainën, një vendim për të cilin do të merret në javët në vijim.

Lajmi u njoftua në Twitter nga ministri i Mbrojtjes i vendit, Mikko Savola.

“Finlanda mbështet Ukrainën. Ne po përgatisim paketën e 12-të të ndihmës. Vendimet do të merren në javët e ardhshme”, thuhet në Twitter.

Sipas ministrit, për arsye sigurie nuk bëhet e ditur përmbajtja e paketës së ndihmës në siguri.

Më herët, Shtetet e Bashkuara konfirmuan një paketë të re të mbështetjes mbrojtëse për Ukrainën në shumën prej më shumë se 3 miliardë dollarë, e cila do të përfshijë, në veçanti, automjetet luftarake Bradley, transportuesit e personelit të blinduar, obusët vetëlëvizës, armët raketore dhe municionet.