Autoritetet e Danimarkës, Belgjikës dhe Holandës njoftuan sot se do të ftojnë ambasadorët iranianë për një diskutim në lidhje me ekzekutimin e dy personave në lidhje me protestat në Iran dhe përmendën përgatitjen e sanksioneve të reja të Bashkimit Evropian.
"Ashtu si vendet e tjera evropiane, ne do të ftojmë ambasadorin iranian," shkroi sot në Twitter ministrja e Jashtme belge Haja Lahbib dhe shtoi se ishte "e tmerruar" nga ekzekutimi i dy burrave në Iran, të cilët u shpallën fajtorë për vrasjen e anëtarëve të një formacioni paraushtarak gjatë një proteste.
Ministrja belge shtoi se "sanksionet e reja të BE-së janë duke u shqyrtuar".
"Ne do të ftojmë (të hënën) ambasadorin iranian në një takim në Ministrinë e Punëve të Jashtme për t'i dërguar atij sinjalin më të fortë të mundshëm dhe të imagjinueshëm se abuzimet e kryera ndaj popullit të tij shkaktojnë indinjatën tonë," tha sot ministri i Jashtëm Lars Rasmussen.
Autoritetet holandeze njoftuan gjithashtu se do të ftojnë ambasadorin iranian dhe shtuan se është duke u përgatitur një paketë e re e sanksioneve të BE-së kundër Iranit.
Më 4 dhjetor, një gjykatë e shkallës së parë në Iran dënoi dy burra me vdekje. Më 3 janar, Gjykata e Lartë e Iranit la në fuqi këto dënime me vdekje, duke i akuzuar ata për vrasjen e 3 nëntorit në Karaj, në perëndim të Teheranit.
Protestat në Iran nisën më 16 shtator, ditën e vdekjes së Mahsa Amini (22) në spital, ku ajo u vendos në një gjendje të rëndë pas arrestimit të saj më 13 shtator në Teheran për "veshje të papërshtatshme" dhe mosrespektim të kodit të rreptë të veshjes për gratë në Iran.
Demonstratat më vonë u shndërruan në një lëvizje kundër autoriteteve fetare të Iranit.
Në Iran, 14 persona janë dënuar me vdekje që nga fillimi i protestave. Katër persona janë ekzekutuar, për katër janë vërtetuar aktgjykimet, gjashtë janë në pritje të gjykimit të ri dhe dy persona kanë bërë ankesë kundër aktgjykimit.
