Përshkallëzimi i konfrontimit midis SHBA-së dhe Rusisë është nxitur nga akuzat e Kremlinit se Uashingtoni qëndron pas sulmit me një dron që synonte të vriste presidentin Vladimir Putin.
Shtëpia e Bardhë, nga ana tjetër, i quajti pretendimet të rreme. Një ditë pasi Kremlini akuzoi Ukrainën për një sulm terrorist, e ktheu vëmendjen te SHBA, duke mos dhënë asnjë provë për të mbështetur akuzat e saj.
Pretendimet ruse se SHBA qëndron pas sulmit me dron kundër Kremlinit janë të rreme, tha zëdhënësi i Sigurisë Kombëtare të Shtëpisë së Bardhë, John Kirby. Ai tha gjithashtu se SHBA nuk inkurajon apo mundëson Ukrainën të kryejë sulme jashtë kufijve të saj.
Rusia ka thënë gjithnjë e më shumë se beson se SHBA është e përfshirë drejtpërdrejt në luftën e Ukrainës, me synimin për të shkaktuar një “disfatë strategjike” për Moskën.
SHBA e ka mohuar diçka të tillë, duke thënë se po armatos Ukrainën në mënyrë që vendi të mund të mbrohet kundër një pushtimi rus dhe të rimarrë territorin e pushtuar ilegalisht nga Moska gjatë 14 muajve të tjerë të luftës.
Megjithatë, pretendimi i Peskov se SHBA qëndron pas një komploti për të vrarë Putinin shkoi një hap më tej se akuzat e mëparshme të Kremlinit kundër Uashingtonit.
Putin nuk ishte në Kremlin në atë kohë dhe analistët e sigurisë hedhin poshtë idenë se incidenti ishte një tentativë për vrasje.
