Rusia ka pretenduar se një nga luftanijet e saj është sulmuar në Detin e Zi nga Ukraina.
Ajo thotë se sulmi në anijen – Ivan Hurs – u krye nga ato që ajo përshkruan si “skafe pa shofer” pranë ngushticës së Bosforit.
Në një deklaratë të postuar në Telegram, ministria e mbrojtjes tha se anija luftarake kishte mbrojtur tubacionet e gazit TurkStream dhe Blue Stream në atë kohë.
Tubacionet transportojnë gaz nga Rusia në Turqi, pjesërisht përmes Detit të Zi.
Ministria përmendi sulmin si një justifikim për zgjerimin e masave mbrojtëse nga Rusia në zonë.
Çfarë janë “skafet pa ekuipazh”
Sipas Sky News, përcjell Telegrafi, “dronët e detit” – të cilët Rusia i ka përshkruar si “skafe pa shofer” – mendohet se janë përdorur më parë në Detin e Zi.
Ato thuhet se mund të udhëtojnë deri në 80 km/h.
Ato besohet se janë përdorur në sulmin ndaj anijes ruse të Detit të Zi, Admiral Makarov, në tetor të vitit të kaluar.
Rusia tha se 16 “dronë detarë” u përfshinë në sulm.
Në janar, iniciativa United24 e Zelenskyy-t nisi një përpjekje për të ndërtuar një flotë prej 100 “dronësh detarë” – të cilët kushtojnë rreth 250,000 dollarë secili.
Duke folur për Sky News më parë, nënkoloneli i ushtrisë amerikane dhe eksperti i luftës me dron, Paul Lushenko tha se dronët detarë janë “vetëm një aks tjetër afrimi” për të synuar asetet ruse.
