Sallonet e flokëve dhe bukurisë në të gjithë Afganistanin do të mbyllen në javët e ardhshme me urdhër të talebanëve.
Mbyllja e tyre do të çojë në humbjen e rreth 60,000 vendeve të punës.
Sallonet ishin lejuar të vazhdonin të funksiononin që kur talebanët rimorën pushtetin dy vjet më parë, por ky pozicion ka ndryshuar, shkruan BBC.
Vendimi kufizon më tej hapësirat e hapura për gratë afgane, të cilave tashmë u është ndaluar hyrja në klasa, palestra dhe parqe.
23-vjeçarja Zarmina ishte në një sallon bukurie duke i lyer flokët në kafe të errët, kur u dha lajmi për mbyllje.
“Pronarja e sallonit mori një tronditje të madhe dhe filloi të qajë. Ajo është mbajtësja e familjes së saj”, tha nëna e dy fëmijëve.
Zarmina jeton në Kandahar në Afganistanin jugor, kështjella konservatore e talebanëve ku banon lideri suprem.
Ajo thotë se është e zakonshme këtu që burrat t'i ndalojnë vajzat e tyre të bëjnë grim ose të shkojnë për një trajtim bukurie.
“Shumica e grave ecin me burka ose hixhab këtu. Ne e kemi pranuar atë si pjesë të kulturës sonë”.
Zarmina u martua në moshën 16-vjeçare. Ajo thotë se një bisedë me estetisten ishte e mjaftueshme për t'i dhënë asaj një ndjenjë të rrallë lirie.
“Nuk më lejuan të largohesha nga shtëpia ime, por arrita ta bindja burrin tim dhe më lejuan të vizitoja sallonin e bukurisë dy ose tre herë në vit”, ka thënë ajo.
Ajo shkonte në sallon me një grua nga lagjja e saj, duke krijuar një miqësi të thellë me një nga punëtoret aty.
Kriza ekonomike kishte hyrë gradualisht në jetën e tyre pasi talebanët rimorën pushtetin në gusht të vitit 2021 pas tërheqjes së forcave amerikane nga vendi.
Liritë e grave janë tkurrur në mënyrë të vazhdueshme që atëherë.
“Tani gratë flasin vetëm për papunësinë, diskriminimin dhe varfërinë”, ka thënë Zarmina.
