LIVE: Vjen një ‘kërcënim’ i fuqishëm për Rusinë - Zelensky ‘shokon’ të gjithë me vendimin e fundit!

Presidenti ukrainas Volodymyr Zelensky njoftoi të premten shkarkimin e krerëve të të gjitha qendrave rajonale të rekrutimit ushtarak të vendit, mes shqetësimeve për korrupsionin.

Sipas mediave të huaja, përcjell Telegrafi, Zelensky tha se një rishikim i qendrave të rekrutimit të Ukrainës zbuloi shenja të abuzimit profesional, duke filluar nga pasurimi i paligjshëm deri te transportimi i burrave të kualifikuar për rekrutim përtej kufirit, pavarësisht një ndalimi gjatë luftës.

“Ky sistem duhet të drejtohet nga njerëz që e dinë saktësisht se çfarë është lufta dhe pse ryshfeti gjatë luftës është tradhti”, citohet të ketë thënë ai në një deklaratë.

Kievi e ka bërë goditjen e ryshfetit një prioritet kyç, pasi kjo do të ndihmonte në ndalimin e pushtimit nga Rusia dhe është gjë që kërkohet për anëtarësimin në Bashkimin Evropian.

Siç vënë në pah mediat, Zelensky tha se gjenerali i lartë Valery Zaluzhny do të jetë përgjegjës për zbatimin e vendimit dhe se kandidatët e rinj për postet do të verifikohen fillimisht nga shërbimi i sigurisë së brendshme të Ukrainës, SBU.

Ukraina është përballur me sfida rekrutimi ndërsa lufta me Rusinë i afrohet 18 muajve dhe ushtria goditet herë pas here nga skandale që zbulojnë korrupsion ose taktika të dyshimta rekrutimi.

Një zëdhënës i inteligjencës ushtarake ukrainase i tha Kyiv Post se njerëzit që jetojnë në Moskë duhet të presin më shumë sulme, veçanërisht pasi mbrojtja ajrore e Rusisë dukej e paaftë për të mbrojtur qytetarët e tyre.

“Duke pasur parasysh dinamikën e muajve të fundit, numrin, gjeografinë dhe intensitetin, do të ishte logjike të supozohej një rritje e sulmeve të përditshme”, u shpreh Andriy Yusov, zëdhënës i inteligjencës ushtarake ukrainase.

Komentet e Yusov vijnë pas një rritjeje dramatike të sulmeve ukrainase në javët e fundit, me një dron që detyroi mbylljen e aeroportit Vnukovo dhe forcat ruse rrëzuan një dron ukrainas mbi Moskë këtë mëngjes.

Jusov vuri në dukje se “koncepti i sigurisë është gjithnjë e më i largët nga banorët e Moskës” dhe shpresonte se kjo rritje e sulmeve do të hapte sytë e banorëve dhe do të thyente propagandën ruse.

“E gjithë bota vazhdon të shohë se sistemi rus i mbrojtjes dhe vendi – i cili pretendon një rol udhëheqës në tregun e armëve – është i paefektshëm, i vjetëruar dhe nuk mund t’i përgjigjet në mënyrë adekuate sfidave moderne”, tha ai.

Një seri shpërthimesh u dëgjuan në Kiev mëngjesin e sotëm. Kryebashkiaku i kryeyqytetit Vitali Klitschko u kishte bërë, më herët, thirrje banorëve që të shkonin pranë vendstrehimeve për t’u mbrojtur nga sulmet ajore, ndërsa në gjithë vendin ishte lëshuar alarmi për sulme të tilla.

Këtë të premte, Ukraina rrëzoi një raketë pranë spitalit të fëmijëve në Kiev, por nuk pati njoftime për të lënduar.

Ndërkohë, në njoftimin e saj të përditshëm mbi sulmin rus ndaj Ukrainës, ministria britanike e Mbrojtjes tha se “ka shanse reale” që një numër i vogël trajnuesish nga të grupit mercenar Wagner të jenë të pranishëm gjatë stërvistjes së trupave bjelloruse në rajonin Grodno, në veriperëndim të Bjellorusisë, pranë kufurit me Poloninë dhe Litaninë.

Sipas njoftimit, ministria e Mbrojtjes e Bjellorusisë tha se stërvitja në zonën e Grodnos "synon të përfshijë mësimet e nxjerra nga ushtria ruse në Ukrainë" duke shtuar se ka të ngjarë se trupat e Wagnerit të veprojnë si trajnues gjatë stërvitjes.

Zyrtarët ukrainas njoftuan gjithashtu se të enjten, në qytetin e Zaporizhias, në Ukrainë, një raketë ruse goditi një hotel ku kanë qendruar shpesh anëtarët e personelit të Kombeve të Bashkuara, duke shkaktuar një të vdekur dhe 16 të plagosur.

Koordinatorija për çështjet humanitare për Ukrainën, Denisë Brown I konfirmoi agjenisë së lajmeve Reuters se personeli i Kombeve të Bashkuara qendronte shpesh në hotelin Reikartz, kur udhëtonte për punë në këtë qytet.

Mes të plagosurve ishin edhe 4 fëmijë,

Të enjten në mbrëmje, marina ukrainase tha se kishte nisur përdorimin e një “korridori humanitar” të përkohshëm dhe se anijet e para pritet të lundrojnë përmes tij për çështje ditësh. Njoftimi vjen pasi muajin e kaluar, Rusia u tërhiq nga marrëveshja që lejonte Ukrainën të eksportonte grurë përmes porteve në Detin e Zi.

Zyrtarët ukrainës thanë se korridori do të përdoret për anijet e saj tregtare që janë bllokuar në portet ukrainase, për prodhimet e grurit dhe produkteve të tjera bujqësore./voa

Mundësia që qeveria gjermane t’i dorëzojë Ukrainës raketat me rreze të gjatë Taurus po shkakton polemika të forta politike pasi në të kaluarën kancelaria dhe ministria e Mbrojtjes kanë refuzuar kërkesën përkatëse të Ukrainës. Megjithatë, sipas raportimeve të mediave gjermane, qeveria federale po shqyrton seriozisht kërkesën për të dërguar raketat moderne të teknologjisë gjermano-suedeze.

Raketa konsiderohet nga Kievi si e një rëndësie kritike për fazën tjetër të kundërofensivës ukrainase.Siç raporton Der Spiegel, ministria e Mbrojtjes është duke u konsultuar në kushte sekreti me industrinë gjermane të mbrojtjes, për të modifikuar disa karakteristika teknike dhe kryesisht për të kufizuar rrezen e tyre.

Kancelari Olaf Solz “absolutisht dëshiron të përjashtojë përmes modifikimeve teknike mundësinë që raketa të përdoret nga Ukraina për sulme në tokën ruse, pasi ai mbetet i shqetësuar për një përshkallëzim të mundshëm të luftës”, raporton Spiegel.

Sipas revistës, këto bisedime sinjalizojnë një ndryshim në qëndrimin gjerman, megjithëse Scholz mbetet i kujdesshëm për dërgimin e raketave me rreze të gjatë veprimi, ashtu si SHBA.

Presidenti serb, Aleksandër Vuçiç planifikon të vizitojë Kinën në tetor, ku mund të takohet me presidentin rus, Vladimir Putin, njoftoi agjencia ruse TASS, duke iu referuar deklaratës së Vuçiç të bërë gjatë një daljeje televizive.

“Deri në fund të vitit pres bisedime serioze dhe të rëndësishme me partnerët tanë shumë, shumë të rëndësishëm. Në tetor do të bëj një vizitë të rëndësishme në Kinë. Pyetja e madhe është se çfarë do të ndodhë atje, sepse pritet edhe ardhja e presidentit rus Vladimir Putin”, tha Vuçiç të enjten në mbrëmje në TV Happy.

Presidenti i Republika Srpska, Milorad Dodik ka deklaruar se ai gjithashtu priste të vizitonte Kinën dhe të takohej me Putinin atje këtë vjeshtë.

Vizita e Putinit në Kinë është planifikuar për në tetor, kur Kina do të presë forumin “Një brez, një rrugë”.

Xi Jinping dhe Vladimir Putin e kanë treguar jo pak herë me krenari marrëdhënien e ngushtë të tyre, edhe në publik. Megjithatë, prej kohësh ka shenja se gjërat kanë marrë një kthesë tjetër, dhe mes presidentit rus dhe atij kinez është futur një i tretë, Volodymyr Zelensky. Instituti për Studimin e Luftës (ISW) thotë se bazuar në një bisedë të fundit midis ministrave të jashtëm rus dhe kinez, duket se ka indikacione se vendet e tyre kanë pikëpamje tërësisht të ndryshme kur bëhet fjalë për luftën në Ukrainë, siç shkruan “Newsweek”. Hendeku mes dy vendeve po thellohet, dhe duket se tani nuk ka më kthim pas.

Telefonata e tensionuar

ISW, një institut me bazë në Uashington, publikoi një vlerësim të bisedës telefonike të së hënës midis Ministrit të Jashtëm rus Sergei Lavrov dhe drejtorit të Komitetit Qendror të Kinës për Punët e Jashtme, Wang Yi. Biseda u zhvillua pasi Kina mori pjesë në një samit në Jeddah të Arabisë Saudite gjatë fundjavës, ku zyrtarët ndërkombëtarë diskutuan mënyrat e mundshme për të arritur paqen në Ukrainë. ISW shkroi se "Kina është gjithnjë e më shumë në kundërshtim me Rusinë për zgjidhjet e propozuara për t'i dhënë fund luftës".

Ndërkohë, SHBA, mbështetësi më i madh financiar dhe ushtarak i Kievit, i bëri thirrje publikisht Kinës që të përmbahet nga mbështetja e Rusisë në luftën e saj me Ukrainën dhe Wang ripohoi se edhe pas samitit të Jeddah, vendi i tij mbetet neutral në luftë. ISW vuri në dukje se ky qëndrim i deklaruar publikisht mbi neutralitetin tregon një përçarje midis Pekinit dhe Kremlinit. Pak përpara se presidenti rus Vladimir Putin të fillonte pushtimin e tij në Ukrainë më 24 shkurt 2022, ai dhe presidenti kinez Xi Jinping nënshkruan një marrëveshje partneriteti “pa kufij”. Ata riafirmuan lidhjet e forta të vendeve të tyre kur Xi vizitoi Moskën në mars 2023, por presidenti kinez gjithashtu telefonoi presidentin ukrainas Volodymyr Zelensky një muaj më vonë dhe tha se Kina ishte e përkushtuar për arritjen e paqes. ISW beson se deklaratat publike të Kinës për paqen ka të ngjarë të shqetësojnë Kremlinin.

Ukraina “mollë sherri”

 ISW preku gjithashtu se si raportet nga ministritë e jashtme për thirrjen midis Lavrov dhe Wang ndryshojnë dhe se si kjo mund të jetë një shenjë e problemeve më të mëdha. Sipas grupit të ekspertëve, Ministria e Jashtme ruse raportoi se Lavrov dhe Wang diskutuan "një sërë temash të nxehta rajonale", duke përfshirë luftën me Ukrainën, ndërsa Ministria e Jashtme kineze raportoi se palët ruse dhe kineze "shkëmbyen pikëpamje mbi luftën". " ISW shtoi se "përshkrimi i bisedimeve nga Ministria e Jashtme kineze mund të sugjerojë se Kremlini është gjithnjë e më i pakënaqur me përpjekjet e vazhdueshme të Kinës për të promovuar axhendën e saj të paqes në forumet ndërkombëtare". ISW ka thënë më parë se Pekini duket të jetë më pak i përkushtuar ndaj partneritetit të tij me Rusinë, të cilin e vuri në dukje pas takimit të Xi me Putinin këtë vit.

Të martën, ISW shkroi se pakënaqësia e dukshme e Kremlinit me deklaratat publike të Kinës për paanshmërinë "është në përputhje me vlerësimet e mëparshme të ISW se Kina nuk është e interesuar për një "partneritet pa pengesa" me Rusinë në mënyrën që do të dëshironte Kremlini".

Lidhjet Pekin-Moskë

Politika e Kinës është e errët, por prioritetet e saj në luftën në Ukrainë janë të qarta, si dhe kontradiktore. Aleanca e saj strategjike me Rusinë bazohet kryesisht në bindjen se masa e Moskës është e dobishme si kundërpeshë ndaj asaj që ajo e konsideron si hegjemoninë e SHBA. Megjithatë, liderët kinezë janë gjithashtu të vendosur të mos shihen si inkurajues të agresionit të Moskës, duke pasur parasysh se ajo luan veçanërisht keq në Evropë, një partner kryesor tregtar. Problemi me qëndrimin e Pekinit është se veprimet e tij flasin më shumë se fjalët e tij. Stërvitjet e përbashkëta të forcave kineze dhe ruse vazhdojnë, duke përfshirë ato në Alaskë javën e kaluar. Kina ka mbështetur ekonominë anemike të Rusisë gjatë kohës së luftës duke rritur ndjeshëm importet e saj të naftës ruse. Dhe sasi të konsiderueshme armësh dhe pajisjet kanë arritur në forcat ruse në muajt e fundit.

Sulmet me dronë ukrainas që ndodhnin brenda Rusisë dikur dukeshin një perspektivë e paimagjinueshme. Por sulme të tilla janë bërë një tipar gjithnjë e më i zakonshëm i luftës së Moskës, me Kievin që paralajmëron se do të vijnë më shumë. Një varg sulmesh me dronë kanë “shqetësuar” qytetet ruse, përfshirë Moskën gjatë gjithë verës. Ato të ditëve të fundit kanë qenë edhe më dramatike. Ushtarët rusë, mesa duket janë shpërqendruar nga një kundërofensivë ukrainase që ende nuk ka dhënë rezultate në fushën e betejës dhe krejt papritur lufta iu ka ardhur në shtëpi.

“Breshëri” sulmesh

Presidenti ukrainas Volodymyr Zelensky paralajmëroi javën e kaluar se lufta po "rikthehet gradualisht" në Rusi, pas sulmeve të fundit me dronë që do të ndodhin brenda vendit që Moska i ka vendosur Kievit. Në incidentet e fundjavës së kaluar, disa ndërtesa në Moskë u shënjestruan nga dronët. Të martën, një dron goditi të njëjtin rrokaqiell në Moskë që u godit të dielën.

Ai pasoi dy tentativa të ngjashme të sulmeve që u raportuan nga zyrtarët rusë më herët në korrik, dhe incidente të shumta të tilla në qershor. Në maj, një sulm me dron mbi Kremlin çoi në imazhe dramatike të shpërthimeve në qiell mbi selinë e pushtetit rus. Sakaq, ditën e djeshme Rusia tha se ka rrëzuar dy dronë ukrainas afër Moskës. Ministria ruse e Mbrojtjes tha se një dron u rrëzua afër një aeroporti të madh në jug të qytetit dhe një në perëndim të Moskës. “Një përpjekje nga regjimi i Kievit për të kryer sulm terrorist me dronë është parandaluar mbi territorin e rajonit të Moskës”, tha Ministria e Mbrojtjes së Rusisë. Një dron u rrëzua afër Domodedovo, ku gjendet një prej aeroporteve më të mëdha ndërkombëtare të Rusisë dhe një tjetër u rrëzua afër autostradës së Minskut, tha kryetari i Moskës, Sergei Sobyanin.

Roli i Perëndimit

Ukraina zakonisht nuk ka marrë përgjegjësinë e drejtpërdrejtë për sulmet, megjithëse përgjigjet e saj janë bërë më të forta javët e fundit. Sakaq, me gjithë ndikimin e propagandës, dërgimi i dronëve në Rusi nuk është një lëvizje pa rrezik për Kievin. Sigurisht nga Moska pritet hakmarrje. Po ashtu, arsye për shqetësim është se si Perëndimi reagon ndaj sulmeve të tilla. Një vit më parë, perspektiva e dërgimit të dronëve nga Ukraina në Rusi ishte e paimagjinueshme, duke pasur parasysh kontratën e heshtur midis vendeve të NATO-s dhe Kievit se Perëndimi do të mbështeste me gatishmëri një luftë mbrojtëse, por do të ishte më i kujdesshëm ndaj çdo veprimi që e fut NATO-n në konflikt të drejtpërdrejtë me Rusinë. "Ne nuk i mbështesim sulmet brenda Rusisë," u tha gazetarëve zëdhënësja e Shtëpisë së Bardhë Karine Jean-Pierre në fund të muajit të kaluar, sipas Reuters.

Lufta e dronëve

“Kyiv Post “ka theksuar se Ukraina po bëhet prodhuesi më i madh në botë i dronëve, si të mjeteve ajrore pa pilot, ashtu edhe të ekuivalentëve të tyre detarë. Kievi do të kishte sukses falë një kombinimi të tre faktorëve: risi e menaxhuar nga lart, dhe për rrjedhojë nga qeveria ukrainase, investime të konsiderueshme të vendosura në tryezë nga sektori privat dhe, së fundi, donacione nga komuniteti.  "Një nivel i tillë i prodhimit të dronëve vdekjeprurës tokësorë dhe lundrues si në Ukrainë nuk gjendet në asnjë vend të botës," theksoi Oleksandr Kamyshin, ministri ukrainas përgjegjës për rritjen e prodhimit ushtarak të vendit. Të gjitha shenjat sugjerojnë se Ukraina po përshpejton ndërtimin e prodhimit të saj ushtarak për t'u bërë, të paktën pjesërisht, autonome.

Në mënyrë që të mos vareni vetëm dhe ekskluzivisht nga mbështetja e huaj. Në lidhje me këtë, ministri Kamyshin nuk dha shifra specifike për kapacitetin prodhues të industrisë së mbrojtjes ukrainase – e cila mbetet konfidenciale, por ai vuri në dukje se ishte dyfishuar në muajin e fundit. Qëllimi i tij është gjithsesi ambicioz: të transformojë industrinë e mbrojtjes të Ukrainës, ende “të ngecur” në epokën sovjetike. “Gradualisht, lufta po kthehet në territorin e Rusisë. Dhe ky është një proces i pashmangshëm, i natyrshëm dhe absolutisht i drejtë”, tha presidenti Volodymyr Zelenksy, dhe mesa duket ai ka patur plotësisht të drejtë.

Bjellorusia ka nisur stërvitjet ushtarake pranë kufirit polak dhe lituanez, duke rritur tensionet në një nivel, që nuk ishte parë ndonjëherë. Shqetësimet janë rritur në Perëndim që kur presidenti I vendit, Aleksandër Lukashenko pranoi të pranonte mercenarët e Wagner-it të dëbuar nga Rusia pas rebelimit të tyre jetëshkurtër dhe Polonia paralajmëroi për kërcënimin e paraqitur nga luftëtarët "jashtëzakonisht të rrezikshëm".

Në përgjigje të fluksit të luftëtarëve Wagner, Lituania, Letonia dhe Polonia kanë rritur masat e sigurisë kufitare, nga frika e ndonjë pakti mes Lukashenkos dhe Yevgeny Prigozhin, të dy “këlysha” të presidentit rus, Vladimir Putin.

Alarm në Poloni

Drejtuesit e qeverisë në Varshavë, në marrëveshje me forcat e armatosura, miratuan lëvizjen e rreth 10,000 trupave në kufirin me Bjellorusinë. Ky është një përshkallëzim në krahasim me atë që u vendos një ditë më parë, kur Polonia kishte dekretuar lëvizjen e 2 mijë ushtarëve në përgjigje të një kërkese për më shumë personel nga Agjencia e Rojës Kufitare, e cila kishte frikë nga perspektiva e një krize migracioni të krijuar nga Aleksandër Lukashenko dhe qeveria e Minskut në kufirin me Poloninë. Qeveria në Varshavë dha alarmin pasi rreth një javë më parë, luftëtarët Wagner u vendosën drejt Suwalki, një korridor strategjik që lidh Bjellorusinë me enklavën ruse të Kaliningradit në Detin Baltik. Ai korridor i Akilit është thembra e NATO-s, sepse nëse rusët e marrin atë, shtetet baltike do të shkëputen nga pjesa tjetër e Aleancës së Atlantikut të Veriut. Disa ditë pas vendosjes së avionëve Wagner pranë korridorit, dy helikopterë ushtarakë bjellorusë që kryenin stërvitje pranë kufirit kaluan në hapësirën ajrore polake.

Rreziku nga Wagner

Udhëheqësi bjellorus dhe vasal i Putinit, Aleksandër Lukashenko ka theksuar vazhdimisht se ai nuk do të shkojë në luftë nëse Ukraina nuk sulmon Bjellorusinë. Megjithatë, megjithëse Lukashenko deri më tani ka qenë relativisht i suksesshëm në shmangien e përfshirjes në një konflikt në shkallë të gjerë nga Putin, ai tani ka mercenarë rusë brenda kufijve të tij. Ish-diplomati bjellorus Valery Kavaleuski beson se pritja e forcave të Wagnerit iu imponua Lukashenkos. "Wagner përbën një kërcënim për Ukrainën, kufijtë e NATO-s dhe shoqërinë bjelloruse, madje edhe për vetë Lukashenkon. Rreziku që ata paraqesin është i madh nga të gjitha anët", tha Kavaleuski për të përditshmen izraelite “Israel Hayom”. Ndërsa presidenti rus lejoi ekzistencën e grupeve ushtarake gjysmë-private si Wagner për shumë vite, Lukashenko nuk lejoi që asnjë qendër alternative e pushtetit të armatosur të shfaqej në vend. Analisti politik bjellorus dhe studiuesi në Fondacionin Carnegie, Artyom Shraibman, thekson se nuk ka gjasa që autokrati bjellorus t'i besojë vërtet grupit të mercenarëve që u përpoqën të rebelohen në Rusi.

“Bomba e emigrantëve”

Aktualisht nuk ka asnjë shenjë se Grupi Wagner po planifikon një sulm ndaj Polonisë ose për marrjen e një korridori strategjik, pasi i mungojnë armët dhe fuqia njerëzore për ta bërë këtë. Megjithatë, incidentet e lartpërmendura, si dhe fakti që Putini ka vendosur armë bërthamore taktike në territorin e Bjellorusisë, tregojnë se Putini po përdor ish-shtetin sovjetik për të destabilizuar aleatët e Ukrainës. Putin teston reagimin e NATO-s me provokime dhe përpiqet ta tërheqë aleancën në konflikte. NATO deri më tani ka reaguar “butësisht” ndaj provokimeve, të cilat mund të jenë në dobi të Rusisë. Megjithatë, analistja Olga Kurnosova për Freedom TV ukrainas thekson se prania e mercenarëve të Wagner dhe ushtarëve bjellorusë në kufi mund të përdoren për provokime, për shembull me refugjatët.

Kujtojmë krizën e refugjatëve të vitit 2021, kur Lukashenko solli refugjatë nga Lindja e Mesme për të krijuar tension në kufirin polak. “Nën maskën e refugjatëve dhe vagneritëve, mund të të nisë aksionin e një grupi për të kryer disa provokime. Gjithashtu është e mundur të bëhet diçka në vetë Bjellorusi, për shembull, që mercenarët të maskohen nën një flamur të rremë”, thekson Kurnosova.

Një zjarr i madh ka shpërthyer në një magazinë pranë rezidencës të Vladimir Putin afër Moskës.

Duke cituar një deklaratë të shërbimit emergjent, agjencia e lajmeve TASS tha se zjarri përfshiu 2,000 metra katrorë në mesnatë, shkruan Metro.co.

Nuk kishte asnjë të dhënë se si filluan flakët në ndërtesë, teksa është gjithashtu e paqartë se çfarë ruhej në magazinë.

Dy drone u rrëzuan në kryeqytetin rus të mërkurën mbrëma, ku njëri shkaktoi një zjarr të madh në një biznes riparimi makinash.

Ministria e Mbrojtjes e Kremlinit fajësoi Ukrainën për dronët.

“Përpjekjet e mbrëmshme të regjimit të Kievit për të kryer sulme terroriste me mjete ajrore pa pilot u penguan mbi territorin e rajoneve të Kaluga dhe Moskë, si dhe në Sevastopol”.

Sirenat e alarmit janë dëgjuar në Kiev pas raportimit të 4 shpërthimeve. Shpërthimet u dëgjuan në të gjithë kryeqytetin ukrainas, sipas raportimeve.

Burimi nuk është konfirmuar, por kanali zyrtar Telegram i Forcave Ajrore të Ukrainës kishte paralajmëruar pak më parë për lëshimin e raketave balistike Kh-47M2.

Alarmet u dëgjuan kudo dhe njerëzit vrapuan drejt bunkerëve për tu mbrojtur.

“Shpërthimet në qytet qëndroni në strehimore,” tha kryetari i bashkisë së Kievit Vitali Klitschko në një mesazh në Telegram.