“Bashkëpunimi ushtarak i Rusisë me Iranin mbetet i palëkundur pavarësisht presioneve gjeopolitike”, kështu ka deklaruar zëvendësministri i jashtëm rus Sergei Ryabkov.
Komentet e tij erdhën pasi Uashingtoni i kërkoi Teheranit të ndalojë shitjen e dronëve në Moskë.
“Nuk ka ndryshime dhe bashkëpunimi me Iranin do të vazhdojë,” tha Ryabkov, sipas agjencisë shtetërore ruse të lajmeve RIA. “Ne jemi shtete të pavarura dhe nuk i nënshtrohemi diktateve të Shteteve të Bashkuara dhe satelitëve të saj”, shtoi ai.
Kujtojmë se SHBA ka ushtruar presion ndaj Iranit për të ndërprerë shitjen e dronëve të armatosur, të cilët po përdoren nga Rusia në konfliktin në Ukrainë, sipas raportit të Financial Times në fillim të këtij muaji. Ky informacion është marrë nga një zyrtar iranian dhe një individ tjetër i njohur me diskutimet.
Edhe pse Irani ka pranuar dërgesat e tij me dron në Rusi, ai ka pretenduar më parë se këto dërgesa kanë ndodhur përpara pushtimit rus të Ukrainës në shkurt 2022. Moska nga ana tjetër ka hedhur poshtë pretendimet për përdorimin e dronëve iranianë gjatë konfliktit në Ukrainë.
