Mbreti i Arabisë Saudite, Salman bin Abdulaziz dhe princi i kurorës Mohammed bin Salman thuhet se kanë pranuar letra nga presidenti iranian Ebrahim Raisi në të cilat ai diskutoi marrëdhëniet dypalëshe dhe mënyrat për t’i përmirësuar ato.
Zëvendësministri i Punëve të Jashtme Walid al-Khereiji thuhet se i ka marrë letrat gjatë një pritjeje në Riad nga ambasadori iranian në Mbretëri, Ali Reza Enayati, njoftoi të enjten Agjencia Saudite e Shtypit, përcjell Telegrafi.
Gjatë pritjes, al-Khereji i uroi mirëseardhjen të dërguarit iranian, “duke i uruar sukses në detyrat e tij të reja të punës”, raportoi SPA.
Enayati mbërriti në Riad më 5 shtator në cilësinë zyrtare.
Aty i pranishëm thuhet se ishte edhe Drejtori i Përgjithshëm i Departamentit të Përgjithshëm të Çështjeve të Azisë, ambasadori Mohammed al-Matrafi.
Dy ish-rivalët rajonalë lanë mënjanë mosmarrëveshjet e tyre dhe arritën një marrëveshje për të vendosur lidhje diplomatike, në një marrëveshje të ndërmjetësuar nga Kina, pasi ato u ndërprenë shtatë vjet më parë.
Sipas marrëveshjes së nënshkruar në mars, Riadi dhe Teherani ranë dakord të rihapin ambasadat dhe konsullatat në vendet e njëri-tjetrit dhe të zbatojnë marrëveshjet e sigurisë dhe bashkëpunimit ekonomik që u nënshkruan mbi 20 vjet më parë.
