Më shumë se 100 delfinë janë gjetur të ngordhur në Amazonën braziliane mes një thatësire historike dhe temperaturave të larta rekord të ujit që në disa vende kanë kaluar 39 gradë Celsius.
Delfinët e ngordhur u gjetën të gjithë në liqenin Tefé, gjatë shtatë ditëve të fundit, sipas Institutit Mamirauá.
Instituti tha se një numër kaq i lartë i ngordhjeve ishte i pazakontë dhe sugjeroi se temperaturat e larta rekorde të liqenit dhe një thatësirë historike në Amazon mund të kenë qenë shkaku.
Lajmi ka të ngjarë të shtojë shqetësimet e shkencëtarëve të klimës mbi efektet që kanë aktiviteti njerëzor dhe thatësirat ekstreme në rajon.
Lumi Amazon, rruga më e madhe ujore në botë, aktualisht është në sezonin e thatë dhe disa ekzemplarë të faunës së lumenjve po vuajnë gjithashtu nga temperaturat e larta.
Studiuesit dhe aktivistët po përpiqen të shpëtojnë delfinët e mbijetuar duke i transferuar nga lagunat dhe pellgjet në periferi në pjesën kryesore të lumit ku uji është më i freskët, raportoi CNN Brasil, por operacioni nuk është i lehtë për shkak të largësisë së zones.
Thatësira në Amazon po ndikon edhe në ekonomi. Nivelet nën mesataren e ujit janë raportuar në 59 komuna në shtetin e Amazonas, duke penguar si transportin ashtu edhe aktivitetet e peshkimit në lumë.
Autoritetet presin thatësira edhe më akute gjatë dy javëve të ardhshme, të cilat mund të rezultojnë në vdekje të mëtejshme të delfinëve.
