Kryediplomati evropian, Josep Borrell ka dënuar sulmin terrorist në Moskë teksa ka kërkuar nga ndërkombëtarët të qëndrojnë të bashkuar kundër akteve terroriste.
Në një postim në rrjetin social “X”, Borrell ka thënë se terrorizmi ka goditur përsëri njerëz të pafuqishëm.
“Unë dënoj në mënyrën më të ashpër sulmin e kryer pranë Moskës gjatë natës së kaluar. Terrorizmi ka goditur përsëri njerëz të pafuqishëm. Komuniteti ndërkombëtar duhet të mbetet i bashkuar në mënyrë të fortë kundër plagës së terrorizmit”, ka shkruar Borrell.
Së paku 115 njerëz u vranë, pasi sulmues të armatosur qëlluan një sallë koncertesh në periferi të Moskës, thanë zyrtarët rusë.
Autoritetet shëndetësore thanë se rreth 145 të tjerë u plagosën – prej tyre rreth 60 në gjendje kritike.
Ngjarja ndodhi në sallën Crocus City në Krasnogorsk, mbrëmjen e së premtes.
Drejtori i Shërbimit Federal të Sigurisë në Rusi, tha të shtunën se 11 persona janë ndaluar lidhur me sulmin në Moskë, përfshirë katër sulmues të armatosur.
