Zëvendës Sekretari i Përgjithshëm i NATO-s Mircea Geoana përshëndeti gatishmërinë e Ukrainës për t’u bashkuar me NATO-n dhe tha se “dera e NATO-s mbetet e hapur” dhe “asnjë dhunë apo frikësim nuk mund ta ndalojë atë”.
Këto komente, Geoana i bëri duke folur në Konferencën e Dyerve të Hapura të NATO-s në Helsinki të mërkurën (10 prill 2024).
Për të shënuar njëzetvjetorin e anëtarësimit të tyre në NATO, ambasadat e Bullgarisë, Estonisë, Letonisë, Lituanisë, Rumanisë, Sllovakisë dhe Sllovenisë organizuan këtë ngjarje.
Në fjalimin e tij virtual, Geoana tha se nuk mund të mendonte për një organizator më të mirë se Finlanda për të folur për politikën e dyerve të hapura të NATO-s. “Së bashku me anëtaren tonë më të re Suedinë, ju i keni treguar botës se çfarë do të thotë liri”, tha ai dhe shtoi se presidenti Putin ka dështuar në përpjekjen e tij për të “përplasur derën e NATO-s”.
Zëvendës Sekretari i Përgjithshëm theksoi se Ukraina, si të tjerat para saj në Evropën Qendrore dhe Lindore dhe Baltik, ka zgjedhur rrugën e anëtarësimit në NATO dhe NATO do të vazhdojë të “ndërtojë një urë që Ukraina të bashkohet me Aleancën tonë të madhe”, teksa po bëhen planet për Samitin e Uashingtonit në korrik.
Nga viti 1949, NATO është rritur nga dymbëdhjetë anëtarë në tridhjetë e dy. Zëvendës Sekretari i Përgjithshëm theksoi se politika e dyerve të hapura të NATO-s ka sjellë më shumë forca, më shumë aftësi dhe më shumë njerëz me aftësi dhe ekspertizë në Aleancë. “Aleatët e NATO-s nga Baltiku deri në Detin e Zi kontribuojnë ndjeshëm në sigurinë kolektive të NATO-s”, tha ai, duke theksuar se këto vende kontribuojnë gjithashtu në ekosistemin e inovacionit të NATO-s.
Konferenca e dyerve të hapura të NATO-s në Helsinki u bashkëorganizua nga ambasadat e vendeve pjesëmarrëse në bashkëpunim me Institutin Finlandez për Çështjet Ndërkombëtare dhe Këshillin Atlantik të Finlandës.
