Anëtari tjetër i Presidencës së BeH-së Shefik Xhaferoviq, i cili bashkë me Zhelko Komshiqin refuzuan të takohen me ministrin e jashtëm rus Sergei Lavrov, tha se BeH-ja ka krenarinë e saj dhe dëshiron të dërgojë mesazh të fortë dhe se të gjithë duhet të respektojnë vendimet e marra nga të gjithë popujt në BeH.
"Duam të ruajmë dinjitetin dhe krenarinë e atdheut të BeH në këtë mënyrë. Federata Ruse është një shtet i madh, një fuqi botërore. BeH-ja nuk është një fuqi botërore, por është një vend shumë i rëndësishëm dhe domethënës në botë. Ne kemi krenarinë tonë dhe duam të themi atë që mendojmë në këtë moment," tha ai në fillim të adresimit para gazetarëve.
Ai tha se Federata Ruse thotë se respekton Marrëveshjen e paqes së Dejtonit, respekton sovranitetin dhe integritetin territorial të BeH-së.
"Por, deklaratat e djeshme në konferencën për shtyp të ministrit Lavrov, të cilat përsëriten përmes sjelljes së ambasadorit rus në BeH, na tregojnë diçka ndryshe. Respektimi i Marrëveshjes së paqes të Dejtonit do të thotë të respektosh të gjitha anekset e saj. Gjëja e parë që përmendet është shteti i BeH-së, vazhdimësia e saj, institucionet flamuri dhe stema. Këto janë simbolet e BeH-së dhe institucioneve të saj. Kjo duhet të respektohet dhe kjo nuk u respektua dje, "tha ai.
Xhaferoviq vuri në dukje se respektimi i Marrëveshjes së Paqes të Dejtonit do të thotë respektimi i të gjitha anekseve.
"Njëri prej tyre është edhe OHR-ja (përfaqësuesi i lartë i bashkësisë ndërkombëtare në BeH) dhe largimi i OHR-së mbështetet nga forcat që flasin për shkëputjen dhe ndarjet etnike. Z. Lavrov e di këtë, dhe nëse thotë se Marrëveshja e Dejtonit respektohet, atëherë OHR duhet të respektohet. BeH-ja nuk mund të funksionojë normalisht sipas kushtetutës pa përfaqësuesin e lartë. Të respektosh Marrëveshjet e Dejtonit do të thotë të respektosh ligjet dhe vendimet e marra nga BeH-ja, përfshirë integrimin Euro-Atlantik. Dje, e gjithë kjo u sfidua në një farë mënyre në një konferencë shtypi pas takimit," tha ai.
Anëtari i Presidencës së BeH-së theksoi se BeH-ja është një shtet multietnik dhe se entitetet dhe shteti janë gjithashtu multietnike dhe se ato janë ndërtuar me respekt për të gjithë popujt në territorin e BeH-së, konstituivë dhe jo-konstituivë, me reformat ekonomike dhe të përgjithshme të shtetit.
"Qëllimet tona janë anëtarësimi në BE dhe NATO. Këto janë qëllimet e përcaktuara të Bosnjë-Hercegovinës dhe të gjitha kombet nga të gjitha pjesët e BeH morën pjesë në këtë, madje edhe ata që e mohojnë atë sot. Komshiq dhe unë vendosëm për këtë veprim pas një diskutimi të gjatë. Vlerësuam se kjo procedurë është një mesazh më i fortë për Federatën Ruse dhe për publikun tonë të brendshëm dhe për të gjithë botën. Ky është një mesazh për miqtë tanë nga Evropa, partnerët për anëtarësimin në BE, partnerët për anëtarësimin në NATO," tha ai.
