Një grup myslimanësh, hebrenjsh dhe të krishterësh u bashkuan të enjten për të hedhur gurthemelin për një qendër që do të strehojë vendet e adhurimit për secilën fe, në një simbol të dialogut ndërfetar në kryeqytetin gjerman.
Sipas mediave të huaja, pak ditë pas protestave në Berlin për konfliktin midis izraelitëve dhe palestinezëve në Gaza, dhe në një kohë kur politikanët po paralajmërojnë rritje të antisemitizmit në Gjermani, “Shtëpia e Përbashkët” ofron një dritë shprese për dialog, thanë themeluesit e saj.
“Është e rëndësishme që konfliktet dramatike botërore mund të diskutohen në kryeqytetin gjerman dhe që njerëzit të kenë një fazë për të nxjerrë në pah problemet në vendet e tyre dhe për të shprehur mendimet e tyre”, ka thënë kryetari i Berlinit, Michael Mueller në ceremoni.
“Por urrejtja dhe dhuna, antisemitizmi dhe islamofobia, racizmi dhe nxitja nuk kanë vend në shoqërinë tonë”, shtoi ai.
Siç bëhet e ditur, ndërtesa, me një kullë të gjatë katrore, do të përmbajë dhoma të veçanta për shërbime fetare dhe një zonë të përbashkët për takime.
Krerët e Këshillit Qendror të Hebrenjve të Gjermanisë dhe Këshillit Qendror të Myslimanëve e kanë mirëpritur projektin dhe shkëmbimin fetar që synon të bëjë të mundur.
Puna e ndërtimit, e cila filloi pas 10 vjet planifikimi, do të zgjasë katër vjet dhe kushton 47.3 milionë euro.
Qeveria gjermane kontribuon me 20 milionë euro, qyteti i Berlinit me 10 milionë euro dhe pjesa tjetër do të vijë nga kontribues të tjerë, përfshirë donacionet nga jashtë.
Qendra do të ndërtohet në vendin e një kishe të shekullit të 13-të e cila u shkatërrua nga qeveria Komuniste e Gjermanisë Lindore në vitet 1960.
