Evropa pritet të ketë një mungesë të madhe të furnizimeve me gaz deri në dimrin e vitit të ardhshëm, paralajmëroi të enjten Agjencia Ndërkombëtare e Energjisë (IEA).
Nëse importet e gazit rus përmes tubacioneve pezullohen plotësisht dhe Kina vazhdon të importojë gaz natyror të lëngshëm në sasi normale, pothuajse gjysma e gazit të nevojshëm për të mbushur depozitimin në nivelin 95 për qind mund të mungojë, paralajmëroi IEA.
Mbushja e depove të gazit në BE ishte më e lehtë këtë vit për shkak të faktorëve të rëndësishëm që mund të mos përsëriten vitin e ardhshëm.
Ndër to ishte edhe fluksi i gazit rus përmes gazsjellësve, i cili u ul në mënyrë drastike gjatë vitit, por ishte kryesisht brenda kufijve normalë në gjysmën e parë të vitit.
Për më tepër, importet më të ulëta kineze të LNG në dhjetë muajt e parë të këtij viti ishin çelësi për furnizimin e Evropës me më shumë LNG për të kompensuar uljen e furnizimit nga Rusia.
“Duke pasur parasysh motin e ngrohtë të kohëve të fundit dhe çmimet më të ulëta të gazit, ekziston rreziku i relaksimit kur bëhet fjalë për furnizimin me gaz të Evropës, por rreziku nuk ka mbaruar aspak”, tha drejtori i IEA Fatih Birol.
"Kur shikojmë tendencat më të fundit dhe zhvillimet e mundshme në tregun global dhe evropian të gazit, shohim se Evropa do të përballet me një sfidë edhe më të madhe dimrin e ardhshëm," paralajmëroi ai.
Andaj qeveritë, tha ai, duhet të marrin menjëherë masa për të përmirësuar efikasitetin e energjisë dhe për të përshpejtuar përdorimin e burimeve të rinovueshme të energjisë dhe pompave të nxehtësisë dhe për të zvogëluar kërkesën për gaz.
