Mbetjet nga ndërtesat e shembura duhet të asgjësohen në mënyrë të sigurt ose në të kundërt ato rrezikojnë përhapjen e sëmundjeve te miliona vendas në 11 qytetet e Turqisë të goditura nga tërmeti, ka paralajmëruar një ekspert në Menaxhimin e Fatkeqësive në Universitetin Gazi të Ankarasë, Bulent Ozmen.
“Mbi 60 000 ndërtesa ose janë dëmtuar rëndë ose janë shembur vetëm në Turqi”, sipas të dhënave të qeverisë, shkruan ATSh.
“Shumica e ndërtesave të shembura ishin të vjetra dhe përmbanin substanca të rrezikshme si asbesti”, tha Ozmen.
“Asbesti mund të shkaktojë kancer ndërsa tubat e prishur të ujërave të zeza rrezikojnë të përzihen me ujin e pijshëm ose zonat bujqësore, duke shkaktuar kolerën”, tha ai.
“Një menaxhim i mirëplanifikuar i mbetjeve mbetet “prioriteti kryesor” në javët dhe muajt e ardhshëm”, tha Ozmen.
“Një ndotje e mundshme e digave rajonale do të rrezikojë shëndetin e miliona banorëve në planin afatgjatë”, paralajmëroi Ozmen.
Rajoni i goditur nga fatkeqësia është një qendër kryesore e prodhimit bujqësor dhe blegtorisë për Turqinë, midis objekteve të tjera industriale.
