Një 14-vjeçar dyshohet se ka vrarë nëntë persona në një shkollë në afërsi të Beogradit.
Nxënësi i identifikuar si Kosta K. raportohet se ka vrarë tetë nxënës dhe rojën e shkollës “Vladislav Ribnikar” në Vraçar.
Djaloshi personalisht ka treguar se ka qëlluar me armë zjarri disa persona, tha sot zëvendëskryetari i administratës së qytetit të Beogradit, Veselin Miliq.
Ai shtoi se armën e ka marrë nga banesa e babait të tij ndërsa kishte edhe katër kokteje molotov, raporton nova.
Miliq deklaroi se kanë zbuluar edhe një listë me emra në banesën e Kosta K. Në të ishin shkruar emrat e nxënësve që ai planifikoi të vriste.
“Kjo ka qenë e planifikuar për një muaj. K.K. e ka planifikuar për një kohë të gjatë, nuk ka bërë të ditur motivin. Armën e zjarrit e ka marrë nga banesa e babait të tij dhe e ka sjellë me katër kokteje molotovi”, tha ai.
Përveç kësaj, ai raportohet se kishte një planimetri të saktë të shkollës, hyrjet dhe daljet.