Ukraina e ka sulmuar një urë që e lidh Ukrainën jugore me gadishullin e Krimesë me raketa britanike me rreze të gjatë veprimi, thonë zyrtarët rusë.
Dy urat paralele Chonhar u dëmtuan të dyja, por askush nuk u lëndua, tha guvernatori i vendosur nga Rusia në Kherson.
Ai tha se ka gjasa që raketat britanike “Storm Shadow” të ishin përdorur në sulm që e quan se është urdhëruar nga Londra.
Ura është rruga më e shkurtër nga Krimea në vijën e frontit në jug. Është gjithashtu një lidhje e rëndësishme me qytetin e pushtuar të Melitopolit, i cili shtrihet në rrugën bregdetare nga kufiri rus përmes Ukrainës jugore deri në Krime.
Rusia e përdor rrugën si një urë tokësore për në Krime dhe Melitopol mendohet të jetë një nga objektivat e kundërofensivës të Ukrainës, e cila filloi në rajonin jugor të Zaporizhzhia në fillim të këtij muaji.
Forcat ruse pushtuan gadishullin e Krimesë nga Ukraina në vitin 2014 dhe më pas në shkurt të vitit të kaluar ata pushtuan edhe rajonin bregdetar jugor të Ukrainës, shkruan BBC.
