Parlamenti Evropian miratoi të enjten Aktin në Mbështetjen e Prodhimit të Municioneve (ASAP) për të përshpejtuar dërgimin e municioneve dhe raketave në Ukrainë dhe për të ndihmuar shtetet anëtare të rimbushin arsenalin e tyre.
Ligji u miratua me 505 vota pro, 56 kundër dhe 21 abstenime. Tani duhet të miratohet edhe nga Këshilli në mënyrë që të bëhet ligj.
“Ky votim shënon një tjetër hap përpara për sigurinë dhe mbrojtjen e Evropës dhe në mbështetjen tonë të palëkundur të Ukrainës përballë agresionit të vazhdueshëm rus. Ne zbatuam aspektin më urgjent të ligjit: sigurimin e ofrimit të më shumë municioneve për Ukrainën. Është një dëshmi e solidaritetit të Evropës dhe për sigurinë tonë kolektive”, tha kreu i ekipit negociator të PE, Cristian Busoi.
Sipas tekstit, të rënë dakord me Këshillin javën e kaluar , ASAP synon të përshpejtojë dërgimin e municioneve dhe raketave në Ukrainë dhe të ndihmojë shtetet anëtare të rimbushin arsenalet e tyre.
Duke futur masa të synuara, duke përfshirë 500 milionë euro financim, ASAP synon të rrisë kapacitetin prodhues të BE-së për të trajtuar mungesën aktuale të produkteve të mbrojtjes, veçanërisht municionet e artilerisë, raketat dhe përbërësit e tyre.
