Në Rusi, çfarëdo që Vladimir Putin dëshiron, ai tashmë po e merr. Pra, nuk është për t’u habitur që banka qendrore njoftoi një rritje emergjente të normës së interesit prej 350 pikë bazë, në 12%.
Para rritjes së normave të interesit rubla kishte rënë me më shumë se 30% kundrejt dollarit këtë vit. Rritja e së martës në kostot e huamarrjes pati pak efekt pasi rubla u forcua më pak se 1% kundrejt dollarit në tregtinë e mëngjesit.
Një monedhë më e dobët do të rrisë inflacionin, duke rritur koston e mallrave të importuara. Kjo do të ushtrojë presion mbi financat tashmë të brishta të familjeve ruse.
Megjithatë, Putini ka vetëm opsione të dobëta për të zgjidhur problemin. Politikat më të forta fiskale ose monetare do të godasin një ekonomi tashmë të dobësuar nga përpjekjet e luftës dhe sanksionet perëndimore.
Megjithatë, duhet përmendur se arsyeja kryesore e rënies së rublës është tkurrja e madhe e suficitit të llogarisë korente të vendit. Pas niveleve rekord në vitin 2022, suficiti ra me 85 për qind në shtatë muajt e parë të vitit në rreth 25 miliardë dollarë, sipas Bankës Qendrore të Rusisë.
Viti i kaluar u karakterizua me rritje të të ardhurave falë eksporteve për shkak të çmimeve më të larta të energjisë, ndërsa sanksionet ulën importet.
Eksportet kanë rënë këtë vit për shkak të embargove europiane të naftës dhe gazit dhe çmimeve më të ulëta të energjisë, ndërsa importet po rriten pasi firmat ruse blejnë mallra nga vendet aziatike që nuk kanë vendosur sanksione.
Para rënies së rublës, Banka e Rusisë kishte parashikuar që çmimet do të rriteshin me 5% në 6.5% këtë vit, mbi objektivin e saj prej 4%.
Rusët tani presin që çmimet të rriten më shumë se 11% vitin e ardhshëm. Ndërkohë, shpenzimet fiskale u rritën me 20 për qind këtë vit, për shkak të rritjes së buxhetit ushtarak dhe shpenzimeve më të larta për pensionet dhe mirëqenien, të urdhëruara nga Putin.
Një mënyrë për të ndihmuar rublën do të ishte shkurtimi i shpenzimeve, por presidenti rus nuk mund të shkurtojë furnizimet për ushtrinë e tij në vështirësi dhe është zotuar të rrisë pensionet shtetërore.
Inflacioni i lartë nuk është i panjohur në ekonomitë e kohës së luftës dhe Putini, i cili me siguri do të rizgjedhet vitin e ardhshëm, nuk përballet me të njëjtat kufizime politike si udhëheqësit perëndimorë.
Por rënia e rublës tregon se rusët po varfërohen dhe sanksionet po i dëmtojnë ata, siç shihet nga një rënie prej 41% në të ardhurat e naftës dhe gazit këtë vit.
Prandaj, këto të dhëna mund t’i japin stimuj SHBA-ve dhe Europës për të ashpërsuar edhe më shumë sanksionet.
