Politikani opozitar rus i burgosur Alexei Navalny e ka quajtur arrestimin e tre prej avokatëve të tij “skandaloz dhe të paligjshëm”. Dy avokatë të tjerë të tij kanë shkuar jashtë shtetit.
“Unë e shoh të gjithë këtë si një vrull të kësaj fuqie të urryer dhe si një reagim që tregon se sa të drejta janë veprimet e mia dhe veprimet e kolegëve të mi,” tha Navalny, cituar nga faqja e pavarur e lajmeve Mediazona.
Të martën, gjykata në qytetin e Kavrov filloi shqyrtimin e padive të ngritura nga Navalny kundër kolonisë së burgut në rajonin e Vladimirit, ku politikani po vuan dënimin me akuzën e mashtrimit. Navalny komunikoi përmes një video-telefonate me gjykatën, por audio dhe transmetimi ndërpriteshin vazhdimisht. Në mbledhje nuk kishte avokatë.
“Në përgjithësi, nuk e kuptoj vërtet se çfarë ndodh. Avokati im nuk është këtu, të gjithë avokatët e tjerë nuk janë këtu, askush nuk po vjen tek unë”, tha Navalny teksa filloi fjalimin e tij.
Sipas Navalny, përpara fillimit të takimit, Komiteti Hetimor e informoi atë se do të kishte “procedura hetimore” dhe e këshilloi që të gjente një avokat.
“Por çfarë veprimesh mund të bëj, kur ende nuk e kuptoj se çfarë ka ndodhur me avokatët e mi, nuk më lënë njeri të më vizitojë, jam krejtësisht i izoluar nga informacioni. Edhe radion Mayak nuk mund të dëgjoj që të informohem se çfarë po ndodh në vendin tonë,” vazhdoi Navalny.
Më 13 tetor, gjykata Basmani e Moskës urdhëroi arrestimin e tre prej avokatëve të Alexei Navalny, përkatësisht Igor Sergunin, Alexei Lipster dhe Vadim Kobzev, të cilët akuzohen si anëtarë të një “organizate ekstremiste”.
Sipas hetimit, avokatët, duke përdorur statusin e tyre për të hyrë në burg, siguruan transferimin e rregullt të informacionit midis drejtuesve dhe pjesëmarrësve të komunitetit ekstremist dhe Alexei Navalny, i cili kështu vazhdoi të përmbushte detyrat e liderit dhe kreut të komunitetit ekstremistit”.
Avokatët e Navalny, Olga Mikhailova dhe Alexander Fedulov, janë larguar nga Rusia.
