Një grup komandantësh ushtarakë në pension u kanë bërë thirrje forcave të armatosura të Spanjës që të bëjnë grusht-shtet për të rrëzuar kryeministrin.
Shoqata e Oficerëve Ushtarakë Spanjoll publikoi një "manifest", të nënshkruar nga 50 anëtarë, në të cilin u kërkohet forcave të armatosura të shkarkojnë Pedro Sanchez dhe të shpallin zgjedhje të përgjithshme, raporton gazeta britanike Times.
Teksti i publikuar në faqen e grupit dhe i datës së djeshme nuk zbulon emrat e nënshkruesve. Ata shkruajnë se janë "të shqetësuar për të ardhmen e Spanjës" dhe kritikojnë marrëveshjen e diskutueshme të amnistisë që Sánchez arriti me separatistët katalanas për të mbajtur pushtetin.
“Rendi kushtetues është në rrezik serioz”
Ata këmbëngulin se ajo heq barazinë para ligjit duke fshirë krimet e tetorit 2017, kur separatistët organizuan një përpjekje të dështuar për pavarësi të paligjshme.
E bërë "për shkak të interesit të vetëm personal" të Sánchez, amnistia "e lë të pafuqishëm shtetin e së drejtës duke anuluar dënimet dhe procedimet në fuqi kundër kriminelëve që ishin protagonistët e grushtit të shtetit në fjalë", argumentojnë ata.
Nënshkruesit citojnë kushtetutën spanjolle, e cila thotë se forcat e armatosura duhet të garantojnë sovranitetin dhe pavarësinë e Spanjës dhe mbrojtjen e unitetit të saj territorial dhe rendit kushtetues.
Ky i fundit, thonë ata, është “në rrezik serioz për shkak të mungesës së pavarësisë së gjyqësorit, pabarazisë së qytetarëve spanjollë përpara ligjit dhe shpërbërjes së mundshme të unitetit të kombit spanjoll”.
“Ne kërkojmë nga përgjegjësit për mbrojtjen e rendit kushtetues... shkarkimin e kryeministrit dhe shpalljen e zgjedhjeve të përgjithshme”, përfundojnë ata. Mediat spanjolle zbuluan disa nga emrat e tyre dhe ish-gradat e tyre. Midis tyre janë gjeneralë-majorë në pension, gjeneral brigade, kolonel, nënkolonelë, komandantë dhe kapiten.
Njoftohen protesta të reja
Aina Vidal, zëdhënëse e grupit politik të ekstremit të majtë Sumar, aleati kryesor i koalicionit të Sanchez, foli gjithashtu.
"E djathta ekstreme po përpiqet të krijojë frikë dhe konfuzion. Ne duhet t'u themi njerëzve qartë dhe me zë të lartë se kjo qeveri është absolutisht legjitime," tha ajo.
Gazeta spanjolle “El Pais” raportoi se manifesti shkaktoi shqetësim te personeli ushtarak aktiv, i cili tha se oficerët në pension që kishin qenë jashtë forcave të armatosura, në disa raste për dekada, u riprezantuan si zëdhënësit e tyre.
Partia Popullore kryesore e opozitës konservatore ka bërë thirrje për një tjetër protestë masive kundër marrëveshjes së amnistisë nesër në Madrid. Partia e ekstremit të djathtë Vox e quajti marrëveshjen një "grusht-shteti" dhe mbajti protesta, të cilat u shndërruan në të dhunshme, jashtë selisë së Partisë Socialiste në kryeqytet për më shumë se një javë.
