Kryeministrja italiane Giorgia Meloni deklaroi se viti i ardhshëm do të jetë po aq kompleks sa edhe viti që po lëmë pas.
Ajo këto komente i bëri në një mesazh drejtuar Konferencës së Ambasadorëve në Ministrinë e Jashtme në Romë.
“Viti që po përfundon ka qenë veçanërisht i ndërlikuar në nivel ndërkombëtar. Dhe gjithçka sugjeron që viti 2024 nuk do të jetë ndryshe. Kjo është gjithashtu arsyeja pse ne kemi nevojë për një Evropë gjithnjë e më të fortë që është një lojtar kryesor. Një lojtar global i aftë për të parandaluar mbushjen e vakumeve strategjike nga të tjerët, duke e projektuar veten si një gjigant gjeopolitik, jo thjesht burokratik", tha Meloni.
Ajo tha se me marrjen e Presidencës G7 nga Italia vitin e ardhshëm, migrimi do të jetë në agjendën e saj për herë të parë.
Kryeministrja italiane përshëndeti gjithashtu marrëveshjen e arritur së fundmi Romë-Tiranë për ngritjen e qendrave të migrantëve të drejtuar nga italianët në Shqipëri.
“Protokolli Itali-Shqipëri është një tjetër pjesë e strategjisë sonë për të luftuar trafikantët dhe për të lejuar vetëm ata që kanë të drejtën e mbrojtjes ndërkombëtare të hyjnë në territorin evropian”, thuhet në mesazhin, të cilin Meloni nuk mundi ta jepte personalisht për shkak të gripit.
“Është një marrëveshje që ka një frymë të madhe evropiane, e cila do të na lejojë të eksperimentojmë me një model të virtytshëm të bashkëpunimit operacional ndërmjet një shteti të BE-së dhe një shteti jo-BE, dhe që, jo çuditërisht, po ngjall interes të vërtetë edhe te vendet e tjera të BE-së. Është një sinjal i rëndësishëm që kundërshton ata që argumentuan se gjërat në frontin e politikës së imigracionit nuk mund të ndryshojnë dhe se nuk kishte hapësirë për zgjidhje novatore dhe të guximshme", ka thënë Meloni.
