Të ftohtit ekstrem dhe stuhitë e borës kanë ndërprerë transportin dhe kanë mbyllur të gjitha shkollat në Skandinavi, ndërsa erërat e forta dhe shirat e dendur në Evropën Perëndimore kanë shkaktuar përmbytje dhe vdekje.
Raportohet se temperaturat ranë nën -40 gradë Celsius në rajonin nordik për të dytën ditë radhazi të mërkurën.
Në Kvikkjokk-Årrenjarka në Laplandën suedeze, temperaturat ranë në -43.6C, që kanë shënuar kështu temperaturat më e ulëta të janarit të regjistruar në Suedi në 25 vitet e fundit, kanë shkruar mediat e huaja.
Temperaturat jashtëzakonisht të ftohta, bora dhe erërat e forta penguan transportin në të gjithë rajonin nordik, janë mbyllur disa ura për qarkullim, janë ndaluar disa trena dhe shërbimet e tregjeve janë pezulluar dhe disa shkolla në Skandinavi u mbyllën, transmeton rtv21.tv.
Policia në pjesën më të madhe të Danimarkës u bëri thirrje shoferëve të shmangin udhëtimet e panevojshme pasi era dhe bora goditën pjesët veriore dhe perëndimore të vendit.
Vala e ajrit të ftohtë nga Siberia dhe rajoni i Arktikut ka përfshirë gjithashtu Rusinë perëndimore, me temperaturat në Moskë dhe zona të tjera që kanë rënë në -30C, shumë nën temperaturën mesatare për fillimin e janarit.
Zyrtarët në Moskë, Shën Petersburg dhe zona të tjera kanë lëshuar paralajmërime të rrezikshme të motit, dhe kanë paralajmëruar banorët kundër rreziqeve të mundshme shëndetësore.
Temperatura e butë dhe me erë mbizotëronte më në jug, ndërsa një stuhi bëri kërdi në pjesë të Evropës Perëndimore.
Një shofer humbi jetën pasi një pemë ra mbi makinën e tij në Anglinë perëndimore, në Britani. Policia e Gloucestershire tha se burri vdiq në incidentin pranë qytetit të Kemble të martën pasdite.
Stuhia, e cila është quajtur Henk nga shërbimet zyrtare të motit të Britanisë, Irlandës dhe Holandës, ka shkaktuar ndërprerje të energjisë elektrike, probleme transporti, dëmtime pronësore dhe përçarje në të gjithë Mbretërinë e Bashkuar.
Më shumë se 300 paralajmërime për përmbytje ishin në fuqi në të gjithë Anglinë dhe Uellsin të mërkurën, ndërsa 10,000 shtëpi mbetën pa energji elektrike.
Një alarm i fortë për përmbytje u shpall për lumin Nene në Northampton në Anglinë qendrore. Disa banorë u evakuuan nga banesat dhe karvanët e tyre.
Në Holandë, policia pranë qytetit të Eindhoven tha se erërat e forta mund të kenë luajtur një rol në vdekjen e një 75-vjeçari, i cili ra nga biçikleta të martën vonë pasi erërat e forta goditën pjesën më të madhe të vendit.
Qindra punonjës të urgjencës nga e gjithë Franca u mobilizuan për të shpëtuar njerëzit nga shtëpitë e përmbytura dhe rrugët dhe përforcime të personelit dhe pajisjeve erdhën nga Çekia, Sllovakia dhe Holanda.
Pompa të fuqishme u futën në punë për të larguar deri në 60,000 metra kub ujë nga qytetet më të goditura drejt Kanalit dhe niveleve të ulëta të ujit rreth deltës së lumit, tha prefektura rajonale në një deklaratë.
Shërbimi kombëtar i motit mbajti paralajmërime për përmbytje dhe erë të enjten për disa rajone në të gjithë Francën veriore dhe kufijtë e saj me Belgjikën, Luksemburgun dhe Gjermaninë, me parashikime për më shumë shira së bashku me erëra deri në 100 km/orë.
Pjesë të Gjermanisë po përballen gjithashtu me përmbytjet, nga të reshurat e vazhdueshme.
