Një re pluhuri “jashtëzakonisht intensive” ka udhëtuar nga Shkretëtira e Saharasë për në Evropë.
Bëhet e ditur se pluhuri ka mbuluar pjesën më të madhe të Spanjës, Francës juglindore, Gjermanisë dhe Britanisë juglindore.
Shkaku i pluhurit saharian, vendet perëndimore tashmë po përballen me “qiej të mjegullt, perëndime shumëngjyrëshe” dhe grimca të vogla PM10, të cilat konsiderohen si mjaft të rrezikshme për shëndetin e njeriut, shkruan skynews.
Shërbimi i Monitorimit të Atmosferës së BE-së, Copernicus (CAMS), renë aktuale të pluhurit e quajti si “jashtëzakonisht intensive”.
Kjo stuhi prej rëre thuhet të jetë e treta e këtij lloji që kaplon Evropën javët e fundit.
Dy retë e mëparshme kanë qëndruar më në jug, mbi Mesdhe dhe Evropën Lindore.
“Ndërsa nuk është e pazakontë që pluhuri i Saharasë të arrijë në Evropë, ka pasur një rritje në intensitetin dhe shpeshtësinë e episodeve të tilla në vitet e fundit, të cilat mund t’i atribuohen ndryshimeve në modelet e qarkullimit atmosferik”, tha Mark Parrington, shkencëtar i lartë në CAMS.
Ndryshe, reja e fundit pritet të largohet të martën, kur edhe udhëton drejt Suedisë, Finlandës dhe Rusisë veriperëndimore.
