Skuadra e Ferrarit arriti dy vende të dyta fundjavën e kaluar në Austri, me Karlos Sainzin në garën sprint të së shtunës dhe me Sharll Leklerkun, në garën e së dielës.
Rezultat ky që motivon mjaft skuadrën italiane, që këtë sezon nuk ka fituar ende asnjë garë. Mjaft i kënaqur duket Leklerk, që në Austri u paraqit mirë si në provat zyrtare ashtu dhe në garë.
“Do të preferoja fitoren, por edhe vendi i dytë shkon mirë.
E rëndësishme është që përmirësimet që kishim sjellë këtu shkuan mirë. Mësuam shumë dhe do të përpiqemi të bëjmë një hap tjetër përpara në garën e “Silverstone”. Po dalim nga tuneli dhe skuadra e ndjen këtë gjë, që era më në fund po frynë në favorin tonë”, tha Leklerk.
“Ne japim maksimumin në pistë, teknikët e inxhinierët në fabrikë dhe jemi të kënaqur.
Do të përpiqemi që të rikthehemi te fitorja sa më shpejt, por jemi realist dhe e dimë se Red Bull është ende para nesh. Në Austri s’mund të shkonim më shumë se vendi i dytë”, tha Leklerk, që e kryesoi garën edhe për 10 xhiro.
