Ismet Munishi ka reaguar në Facebook pas vendimit të Komisioni Disiplinor për ta dënuar me 1500 euro.
Komisioni Disiplinor e ka dënuar trajnerin e KF Vëllaznimi, Ismet Munishi, me një shumë të hollash prej 1500 eurove.
Ky vendim erdhi pas veprimeve të Munishit në ndeshjen e Digitalb Kupës së Kosovës mes Vëllaznimit dhe Dritës, e zhvilluar me 10 shkurt në stadiumin e qytetit në Gjakovë.
“Ismet Munishi, trajner i klubit të futbollit “VËLLAZNIMI“ nga Gjakova me licencë UEFA “A“ 0282 për largim nga bankina (reagime ndaj vendimeve të gjyqtarëve të ndeshjes), dënohet me të holla në shumë prej; 1500 euro (njëmijë e pesëqind) në bazë të Rregullores Disiplinore neni 40 paragrafi 1 pika 3 dhe neni 10 paragrafi 3”, bëri të ditur FFK-ja.
Federata e Futbollit të Kosovës i ka shqiptuar këtë vendim me një afat pagese deri në 15 ditë dhe ka të drejtë ankese në afat kohor prej tetë ditësh.
Me t’u mësuar ky lajm, Ismet Munishi ka reaguar në llogarinë zyrtare në rrjetin social, Facebook.
Ai e ka pritur me shumë humor këtë vendim të Komisionit Disiplinor.
“Me këtë dënim i fitoj 150 mijë euro nga Libri i rekordeve, Ginis. Jam në fitim 148500 euro, duke mos i llogarit zhiletat”, shkruan ai në Facebook.
