Mallorca nuk është e gatshme t’i paguajë 11 milionë euro për kartonin e sulmuesit të Kosovës, aq sa i kërkon Lazio, përkundër faktit se e pëlqen shumë “Piratin”. 28 vjeçari do të largohet nga Italia gjatë verës dhe e ardhmja e tij mund të jetë në futbollin turk
Vedat Muriqi nuk do ta veshë fanellën e Mallorcas në sezonin e ardhshëm.
Përkundër interesimit të madh për sulmuesin, klubi spanjoll nuk është në gjendje t’i paguajë 11 milionë euro, të kërkuara nga Lazio.
Natyrisht, kjo do të jetë një humbje e madhe për klubin ishullor, i cili tash është fokusuar diku tjetër.
Mallorca në fakt ia ka vënë syrin sulmuesit Carles Perez, i cili është pjesë e Romës.
Muriqi e pati një eksperiencë pozitive në Mallorca, ku i realizoi 5 gola dhe i bëri 3 asistime në 16 ndeshje të zhvilluara.
Ai ishte huazuar në janar nga Lazio, ndërsa e ndihmoi klubin spanjoll të mbetet në La Liga.
Sidoqoftë, atij i përfundoi huazimi dhe tash do të rikthehet përkohësisht në Lazio.
Klubi italian po planifikon ta shesë 28 vjeçarin pasi ai e pati një eksperiencë dëshpëruese në Itali.
Muriqi i kishte shënuar vetëm 2 gola dhe i kishte bërë 2 asistime për një vit e gjysmë në Romë.
Interesim për prizrenasin kanë shfaqur klubet turke, ish-klubi i tij, Fenerbahçe dhe Galatasaray.
