Milani ende nuk ka arritur një marrëveshje me Klub Brizhin për Sharll De Ketelaere, pasi dy klubet në dukje janë larg marrëveshjes. Drejtori Paolo Maldini fluturoi në Belgjikë në fillim të kësaj jave për negociata ballë për ballë, duke shpresuar se ata do të ishin në gjendje të zgjidhnin situatën, me besim se lojtari ishte i vendosur t’i bashkohej atyre në “San Siro”.
Oferta përfundimtare ishte 30 milionë euro, plus dy milionë të tjera në bonuse të lidhura me performancën dhe sot ishte menduar të ishte afati i fundit për të pranuar ose për të filluar kërkimin diku tjetër.
Sipas La Gazzetta dello Sport dhe Calciomercato.com, skuadra belge kërkon ende 35 milionë euro, plus shtesa për lirimin e mesfushorit. Situata tani është në një ngërç dhe ose Milani e ngre ofertën e tyre edhe një herë ose duhet të marrë në konsideratë objektiva të tjera transferimi.
Lids Junajted ishte konkurrenca e tyre më e madhe për De Ketelaere, duke ofruar 37 milionë euro përfshirë bonuset, por që atëherë ata kanë lëvizur përpara, duke kuptuar se lojtari preferonte Milanin.
