Trajneri i Milanit, Stefano Pioli, ka zbuluar se klubi po planifikon t'i ofrojë Rafael Leaos një kontratë të re në të ardhmen e afërt mes spekulimeve të vazhdueshme rreth një kalimi të mundshëm te portugezit në Chelsea.
“Blutë” besohet se kanë bërë një ofertë prej 80 milionë euro për Leaon në ditët e fundit të afatit kalimtar por e cila u refuzua menjëherë nga kuqezinjtë.
Chelsea supozohet se do t'i duhej të paguante klauzolën e plotë të lirimit të Leaos prej 150 milionë euro nëse dëshironin ta merrnin atë këtë verë.
Leao shijoi një sezon fantastik vitin e kaluar, duke shënuar 14 gola dhe duke regjistruar 12 asistime në 42 paraqitje në të gjitha garat.
Ndërkohë, 23-vjeçari ka qenë në formë të lartë në fillim të këtij sezoni, duke shënuar tre herë dhe duke dhënë dy asistime në pesë paraqitje në Serie A.
Leao luajti në derbin e së shtunës me Interin, duke shënuar dy herë dhe duke dhënë një asistim, teksa kampionët në fuqi shënuan fitore me rezultat 3-2 ndaj rivalëve të tyre.
Marrëveshja ekzistuese e sulmuesit ka edhe dy vite deri në përfundim, por Pioli ka thënë se klubi po planifikon t'i ofrojë atij mundësinë për të nënshkruar një kontratë të re.
"Klubi dëshiron t'i ofrojë Leaos një marrëveshje të re së shpejti. Ata do të kujdesen për këtë, ndërsa ai po punon në nivelin më të mirë. Ai nuk po krijon asnjë problem, ai thjesht po punon shumë si një profesionist i madh," u tha Pioli gazetarëve.
