Tifozët e futbollit që do të shkojnë në Kupën e Botës do të përballen me një kaos të mundshëm udhëtimesh. Kjo për shkak se aeroporti kryesor i Katarit nuk është “gati” për deri në 1600 fluturime në ditë, ndërsa tifozët do të dynden nga e gjithë bota.
The Mail pretendon se mungesa e punëtorëve në Hamad International ka ngritur shqetësime për sigurinë përpara turneut të nëntorit, me stafin që tashmë po përpiqet të përballet me 700 fluturime në ditë. Ekziston frika se ata që punojnë në kontrollin e trafikut ajror kanë shumë punë që tani.
Dhe një zyrtar pretendon se aeroporti është “në pikë krize” pasi numri i pasagjerëve që mbërrijnë dhe largohen parashikohet të jetë më shumë se DYFISHI për Kupën e Botës.
Thuhet se e lufta për të rekrutuar punëtorë të rinj është e tillë sa shumë vende pune po jepen “pa kryerjen e trajnimit të nevojshëm”. Ndërkohë, të punësuarit tashmë janë paralajmëruar se do të “trajtohen nga shteti” nëse zbulohen se “sabotojnë” operacionin.
Ekziston një ndjenjë se shumë fluturime do të vonohen, ndërsa të tjera madje do të devijohen për në Dubai – GJASHTË ORË E GJYSMË me makinë larg.
Edhe pushimet vjetore janë anuluar deri në fund të vitit. Dhe punëtorët kanë frikë se nuk janë marrë masa për sezonin famëkeq të shirave të Katarit.
Diku tjetër, disa tifozëve mund t’u thuhet se lejohen të marrin vetëm bagazhet e dorës për të lehtësuar qarkullimin pas mbërritjes.
Dhe shumë punonjës janë ndaluar të largohen nga postet e tyre pasi u është thënë se do të “monitorohen nga afër nga individë të nivelit të lartë dhe përfaqësuesit e tyre”.
Në media është zbuluar një dokument ku thuhet se: “Stafi që besohet se nuk është plotësisht i motivuar drejt suksesit përfundimtar dhe gjithashtu motivimi i të tjerëve që të mos marrin pjesë në suksesin e eventit mund të konsiderohet se ka qëllime të fshehura për të sabotuar planet shtetërore”.
Duke iu përgjigjur këtyre pretendimeve, Autoriteti i Aviacionit Civil të Katarit tha: “Kontrolli i trafikut ajror QCAA operon sipas standardeve më të larta ndërkombëtare dhe i merr përgjegjësitë e tij jashtëzakonisht seriozisht.
“Objektivi ynë kryesor është të sigurojmë rrjedhën e sigurt dhe të shpejtë të trafikut ajror dhe të përmirësojmë udhëtimin e pasagjerëve për të gjithë përdoruesit.
“Në pritje të rritjes së trafikut gjatë Kupës së Botës, Shteti i Katarit ka përmirësuar sistemet e tij të kontrollit të trafikut dhe ka ekzekutuar plane të përpikta që ishin konceptuar shumë përpara organizimit të ngjarjes.
“Kontrolluesit e trafikut ajror i nënshtrohen trajnimit dhe kontrollit të vazhdueshëm sipas kërkesave ndërkombëtare. Sistemi i menaxhimit të trajnimit dhe sigurisë i QCAA plotëson dhe tejkalon standardet e përcaktuara nga Organizata Ndërkombëtare e Aviacionit Civil dhe ne jemi audituar me sukses sipas këtyre standardeve”.
