Ai mund të ketë fituar çmimin si trajneri më i mirë në botë për dy vite radhazi (2019 dhe 2020), por kjo nuk do të thotë se Jurgen Klopp është i pëlqyer nga të gjithë.
Sigurisht, trajneri gjerman i Liverpool-it është një nga trajnerët më të dashur, por në futboll dihet se si shkojnë gjërat: për sa kohë që nuk fitohet është e vështirë të gjesh armiq, por pastaj, sapo fillohet të fitohet diçka, fillojnë kritikat.
Duke marrë parasysh se brenda dy sezoneve Liverpool-i i tij fillimisht fitoi Champions League dhe më pas theu agjërimin 30-vjeçar në Premier League, mjafton që Klopp të marrë dozën e tij të ngacmimeve, siç ndodh për të gjithë kolegët po aq të famshëm.
Një kritikë vjen nga një ish-lojtar në kohën e Borussia Dortmund. E çuditshme, duke qenë se lojtarët që kanë punuar me Klopp zakonisht e përshkruajnë atë pothuajse si një baba të dytë.
Nuk është kështu për Adrian Ramos, i cili e gjeti veten duke ndarë dhomën e zhveshjes me gjermanin në atë që ishte sezoni më i keq i trajnerit në Signal Iduna Park. Dhe siç tha për Goal pak kohë më parë, kolumbiani kishte disa probleme në lidhje me trajnerin.
“Ai me të vërtetë më donte mua në skuadër, por ishte një sezon katastrofë, dukej sikur përfunduam në filmin e gabuar”. Dhe fakti që për disa ditë Borussia ishte edhe e fundit në renditje flet shumë. Në atë moment për Ramos, aktualisht tek America de Cali, nuk kishte shumë mundësi.
“Fatkeqësisht, pas disa ndeshjesh praktikisht nuk luajta më. Klopp u besonte më shumë lojtarëve të tjerë. Ai tha se nuk stërvitesha mjaftueshëm. Pasi më përjashtoi nga skuadra për zgjedhje teknike, ishte diçka që më hidhëroi.
“Nuk më dukej e drejtë, në fund të fundit nuk isha i vetmi me një formë të luhatshme. Dhe ka raste kur portën nuk e sheh as në stërvitje. A më bën kjo një lojtar më të keq se të tjerët ?
“Jo, është çështje besimi. Dhe megjithëse mësova shumë nga Klopp, e ndjeva vetëm besimin e tij në fillim”. Jo pikërisht përshkrimi që shumica e ish-lojtarëve të tij i bëjnë gjermanit.
