Shqipëria humbi 1-0 në miqësoren e fundit të Katarit, por loja e zhvilluar duket se ka kënaqur Edi Rejan. Lojtarët e grumbulluar për këtë përballje, por edhe për atë të mëparshmen kundër Arabisë Saudite, kanë vënë në vend nderin e “Abissnet Superiores”.
Elementët e ftuar nga Reja kanë treguar se vlen të kthehet vëmendja edhe nga produkti vendas.
Këtë e pranon edhe vetë trajneri italian, i cili në një prononcim pas ndeshjes ka thënë: “Jam i kënaqur nga paraqitja. Lojtarët kanë punuar mirë këto ditë. Jam i kënaqur pak a shumë nga të gjithë. Por besoj se 4 apo 5 prej tyre do t’i marr në Kombëtare”.
Ndërkohë “TV Klan” ka mësuar edhe tre prej lojtarëve që kanë siguruar një ftesën më të rëndësishme në karrierën e tyre. Serxho Ujka, Rudolf Turkaj dhe Arinaldo Rrapaj me shumë mundësi do të jenë pjesë e Kombëtares edhe për miqësoret e radhës kundër Italisë dhe Armenisë.
