Kombëtarja e Kosovës në grupmoshat U19 ka zhvilluar sot përballjen kundër Ukrainës, nga e cila u mposht me rezultat minimal 1:0.
Ndeshja e sotme ishte e vlefshme për xhiron e parë të Grupit 3 të fazës së “Main Round” për kualifikimet drejt Kampionatit Evropian 2023.
“Dardanët” ishin tejet të pafat pasi që futbollistët ukrainas e shënuan golin e fitores në çastet e fundit të ndeshjes, respektivisht në minutën e 5’ të lojës shtesë.
Ukraina ishte më e rrezikshme gjatë pjesës së dytë, por që “Dardanët” e rinj treguan paraqitje solide duke mos lejuar shumë hapësira ukrainasve për ta gjetur golin.
Ndeshja e radhës për Kombëtaren e Kosovës në grupmoshat U19 do të jetë këtë të diele, ku do të përballet me Suedinë nga ora 18:30 në stadiumin “NYA Parken Norrkoping”.
“Humbja në çastet e fundit është e dhimbshme, por ky është futbolli. Kemi qenë të vetëdijshëm se Ukraina është një kundërshtar i fortë. I përgëzoj djemtë për një angazhim maksimal, disiplinë dhe karakter të fortë. Ne nuk do të dorëzohemi në asnjë mënyrë. I kemi edhe dy ndeshje dhe do të kërkojmë më të mirën e mundshme. Është e qartë se kërkohet fitore dhe ne synojmë të fitojmë ndonëse nuk është aspak e lehtë”, tha pas ndeshjes trajneri i Kosovës U19, Ramiz Krasniqi.
Ukraina U19 1:0 Kosova U19 (golashënues Yamoliuk, minuta e 90+5’)
