Kosova në zi për futbollistin Erion Kajtazi, dje vdiq papritur në fushën e lojës.
Presidenti i FFK-së, Agim Ademi, shkruan disa fjalë emocionuese për talentin e Trepçës ’89 të Mitrovicës dhe reprezentues i Kosovës.
“Lamtumirë Erion!
Sot familjarë, bashkëlojtarë, trajnerë, mësimdhënës, shokë e miq të shumtë ia dhamë lamtumirën Erion Kajtazit, djaloshit, nxënësit e futbollistit shembullor mitrovicas.
Ikja e tij në lulet e rinisë la të pikëlluar jo vetëm familjen, por edhe të gjithë ata që e njohën, si dhe mbarë komunitetin e futbollit.
Eri, siç e thërrisnin të gjithë, ishte inteligjent, plot vullnet për jetë dhe me ëndrrën për t’u bërë emër i madh i futbollit.
Atëherë kur ishte në rrugën e duhur për ta realizuar ëndrrën e tij, Perëndia e mori afër vetes si një engjëll.
Eri shquhej si njëri nga talentet më të mëdhenj të gjeneratës së tij dhe ishte shembull në fushën e gjelbër. Ai e dha kontributin e tij edhe në fanellën e Kombëtares U17, derisa ishte afër transferimit në futbollin evropian, atje ku synonte ta ndërtonte karrierën e tij të bujshme.
Shuarja e Erit është dhembje e madhe për familjen dhe humbje e madhe për futbollin tonë.
Në këtë ditë pikëllimi të ndarjes fizike prej tij, lus Zotin që familjes t’i japë forcë për ta përballuar këtë dhembje të madhe.
Eri do të jetë pjesë e pandashme e çdo zemre që pati fatin ta njohë!
I lehtë i qoftë dheu i Kosovës!”, ka shkruar Ademi.
